დემოკრატია კრიზისშია - ასეა დასათაურებული ანგარიში, რომელიც Freedom House-მა დღეს გამოაქვეყნა. ანგარიშში ნათქვამია, რომ 2017 წელს, პოლიტიკური უფლებებისა და სამოქალაქო თავისუფლებების თვალსაზრისით, მსოფლიო მასშტაბით ბოლო 10 წლის განმავლობაში ყველაზე ცუდი სურათი დაფიქსირდა.
Freedom House-ის ანგარიშში საქართველო ნაწილობრივ თავისუფალი ქვეყნების სიაშია და იმ ქვეყანათა შორის არის მოხსენიებული, რომლებიც, დემოკრატიის ტრაექტორიის ცვლილების თვალსაზრისით, განსაკუთრებული დაკვირვების ობიექტია.
2018 წლის ანგარიშში, რომელიც დღეს გამოქვეყნდა, ნათქვამია, რომ „მმართველმა პარტიამ, „ქართულმა ოცნებამ“ ახლახან მიიღო კონსტიტუციური ცვლილებები, რომლებიც თავისი კარჩაკეტილი მილიარდერი გულშემატკივრის ფინანსური მხარდაჭერის გათვალისწინებით, დანაწევრებული ოპოზიციის მომავალ არჩევნებში კონკურენტუნარიანობას კიდევ უფრო ნაკლებად სავარაუდოდ ხდის და პარტიის ხელში მართვის სადავეებს პოტენციურად კიდევ რამდენიმე წელწადს დატოვებს“.
ამ ჩამონათვალში საქართველოს გარდა კიდევ 9 ქვეყანაა, მათ შორის ავღანეთი, ერაყი, საუდის არაბეთი და აშშ.
ანგარიშში ნათქვამია, რომ ევრაზიაში დემოკრატიისთვის ყველაზე საგანგაშო საფრთხე ავტორიტარული ძალების მიერ მათი კრიტიკოსების დასასჯელად საზღვარგარეთ ხელის გადაწვდენაა.
„აზერბაიჯანელი ჟურნალისტი აფგან მუხთარლი თბილისში მოიტაცეს მამაკაცებმა, რომლებიც, სავარაუდოდ, ქართულად საუბრობდნენ, გადაიყვანეს საზღვარზე აზერბაიჯანში, რითაც ძლიერდება გატაცებაში ქართული მხარის მონაწილეობის ეჭვი“ - ნათქვამია ანგარიშში.
ანგარიშის თანახმად, თავისუფლების ხარისხი მსოფლიო მასშტაბით მნიშვნელოვნად გაუარესდა. ბოლო ათი წლის განმავლობაში ყველაზე დიდი ვარდნა თურქეთს აქვს. მისი მაჩვენებელი 34 ერთეულით გაუარესდა და ნაწილობრივი თავისუფალი ქვეყნის სიიდან არათავისუფალი ქვეყნების სიაში გადაინაცვლა.
რაც შეეხება შეერთებულ შტატებს, ანგარიშში ნათქვამია, რომ ორგანიზაციამ ბოლო შვიდი წლის განმავლობაში აშშ-ში პოლიტიკური უფლებებისა და სამოქალაქო თავისუფლებების ხარისხის კლება დააფიქსირა.
„მნიშვნელოვან შენიშვნებს შორის აღმოჩნდა პოლიტიკაში ფულის გავლენა, საკანონმდებლო დისფუნქცია, სისხლის სამართლის სისტემაში მნიშვნელოვანი უთანასწორობა“.
ამჟამად აშშ-ს 100-ქულიანი სისტემიდან 86 ქულა აქვს მინიჭებული.
