დღეს სახალხო დამცველის ოფისში „ნაციონალური მოძრაობის“ წევრები ნინო ლომჯარიას შეხვდნენ. შეხვედრის დასრულების შემდგომ სახალხო დამცველმა ნინო ლომჯარიამ განაცხადა, რომ შეხვედრისას შეფასდა თუ რამდენად საკმარისი მტკიცებულებები იყო წარმოდგენილი იმისთვის, რომ ყოფილი პრეზიდენტი შეწყალების აქტის განხორციელების გამო პასუხისგებაში მიცემულიყო.
„ჩვენ ვაკვირდებით ყველა იმ პროცესს სასამართლოში, რაზეც დღეს იყო საუბარი, მათ შორის მიხეილ სააკაშვილის წინააღმდეგ მიმდინარე დავებს. რაც შეეხება ჩემს შეფასებებს, ამ ეტაპზე ჩვენ, რა თქმა უნდა, ველოდებით სასამართლოს გადაწყვეტილებას, ჩვენ შევაფასებთ და გვექნება პოზიციები, იმასთან დაკავშირებით, თუ რამდენად დაასაბუთა სასამართლომ ბრალი, რამდენად საკმარისი და სათანადო მტკიცებულებები იყო წარმოდგენილი იმისთვის, რომ პრეზიდენტი მიცემულიყო პასუხისგებაში შეწყალების აქტის გამო. ესაა საკითხები, რომელსაც ჩვენ შევხედავთ, შევაფასებთ. გარდა ამისა, იქიდან გამომდინარე, რომ ესაა, ფაქტობრივად, პირველი პრეცედენტი საქართველოს კონტექსტში, ჩვენ ასევე ვახორციელებთ საერთაშორისო პრაქტიკის შესწავლასაც, რათა ვნახოთ ანალოგიურ სიტუაციებში რა გადაწყვეტილებები აქვს მიღებული, როგორც საერთაშორისო სასამართლოებს, ასევე დემოკრატიულ ქვეყნებს“, - განაცხადა ნინო ლომჯარიამ.