თბილისის მერია Facebook-ზე მერიის საქმიანობასთან დაკავშირებით განთავსებული ინფორმაციისა და აქტივობების რეკლამირების (დასპონსორების) მომსახურების გამარტივებული შესყიდვისთვის სააგენტოსგან ნებართვას ითხოვს და მზადაა, ამ მომსახურებებისთვის 60 000 აშშ დოლარი გადაიხადოს.
როგორც თბილისის მერის ბრძანებაშია ნათქვამი, მერიის მიერ Facebook-ზე განთავსებული ინფორმაციის გავრცელებასა და მისი ხელმისაწვდომობის გაზრდის მიზნით, საჭიროა მერიის აქტივობების რეკლამირების მომსახურებით სარგებლობა.
შესყიდვის მიზანია, Facebook-ზე განთავსებული ქალაქ თბილისის მუნიციპალიტეტის მერიის, რაიონული გამგეობებისა და მერის ოფიციალური გვერდების პოპულარიზაცია (12 Facebook- გვერდი).
„აღნიშნულ სოციალურ ქსელს საქართველოში, მათ შორის თბილისში, ყველაზე მეტი მომხმარებელი ჰყავს. შესაბამისად, მიზანშეწონილია Facebook-ით გავრცელებული ინფორმაციის ხელმისაწვდომობის გაზრდა, ამა თუ იმ თემატიკის ინფორმაციის მეტი მომხმარებლისთვის გაცნობა“, - წერს მერია შესყიდვების სააგენტოს.
შესყიდვების სააგენტოსგან თანხმობის მიღების შემდეგ მერია აღნიშნულ მომსახურებაზე გამარტივებულ წესით შეიძენს.
აღნიშნულის შესახებ ინფორმაცია თავდაპირველად ონლაინგამოცემა news.on.ge-მ გაავრცელა.