„ქართული მარში“ გეგმავს, „სახახლო პატრული“ ჩამოაყალიბოს, რომელიც თბილისის ქუჩებში „უცხოელი არალეგალების, კრიმინალებისა და ტერორისტების“ მიერ საზოგადოებრივი წესრიგის დარღვევას გააკონტროლებენ.
„სახალხო პატრულის“ შექმნის ინიციატივის შესახებ Facebook-ზე ერთ-ერთმა რადიკალურმა ჯგუფმა გაავრცელა. „სახალხო პატრული" დაკომპლექტდება ეროვნული სულისკვეთების მქონე ახალგაზრდებით" - ნათქვამია განცხადებაში, რომელსაც თან ძალადობის შემცველი ვიდეო ახლავს.
„ქართული მარშის“ წარმომადგენელი სანდრო ბრეგაძე „ლიბერალთან“ საუბარში ამბობს, რომ ასეთი მოდელი ევროპის ქვეყნებში უკვე არსებობს . მისი თქმით, „ქართული მარში" გეგმავს, საქართველოში უკანონო ემიგრანტების ყოფნა გააკონტროლოს.
მისივე თქმით, „სახალხო პატრულის“ წევრობის სურვილი 300-მდე ახალგაზრდამ გამოთქვა. ბრეგაძე განმარტავს, რომ ახალგაზრდები 15-15 კაციან ჯგუფებად დაიყოფიან და ფორმებით იმოძრავებენ. მისი თქმით, ჯგუფები თბილისის ქუჩებში, საწყის ეტაპზე მარჯანიშვილისა და რესპულიკის მოედანზე, დაახლოებით ერთ თვეში გამოჩნდებიან.
შეკითხვაზე, თუ რა იგულისხმება საზოგადოებრივი წესრიგის დარღვევაში, ბრეგაძე პასუხობს, რომ ეს არის ყველა ის ქმედება, რომელიც კანონს არღვევს.
„[ეს არის] ტრეფიკინგი, საეჭვო ტიპის დაწესებულებები, სადაც იყიდება ნარკოტიკები, არასრულწლოვნების პროტიტუციის ჩართვა - ეს ხდება ქუჩაში“ - ამბობს ბრეგაძე.
მისი თქმით, „სახალხო პატრული“ კამერებით იქნება შეიარაღებული და ასეთი ფაქტების აღმოჩენის შემთხვევაში, ინფორმაციას სამართალდამცავ უწყებებს მიაწვდის.
იგი ასევე ამბობს, რომ „პატრულის“ შექმნის მიზეზი ის არის, რომ სახელმწიფომ ქვეყანაში „უცხოელი ტერორისტებისა და კრიმინალების შემოდინების შეჩერება ვერ უზრუნველყო“.
„ქართულმა მარშმა" თბილისში ქსენოფობიური და ჰომოფობიური შინაარსის არაერთი აქცია გამართა. მათ მარჯანიშვილზე „ევროპული საქართველოს" მსვლელობას ქვები დაუშინეს, ფეხბურთის ფედერაციასთან კი ლგბტ დროშა დაწვეს. ჯგუფმა „რუსთავი 22თან" გამართულ აქციაზე ტელევიზიის შენობას ცოცხალი ქათმები დაუშინა.
