ამერიკული გამოცემა Bloomberg-ის მიხედვით, ბიძინა ივანიშვილის ქონებამ 30 იანვრიდან კლება დაიწყო და 7 თებერვლისთვის 122 მილიონით დაიკლო. ყოფილი პრემიერ-მინისტრის ქონება 5.92 მილიარდი დოლარიდან 5.8 მილიარდ დოლარამდე შემცირდა. ამჟამად მსოფლიოს უმდიდრეს ადამიანებს შორის ივანიშვილი 310-ე ადგილზეა.

ბოლო დღეებში შემცირდა ზოგადად მსოფლიოს უმდიდრეს ადამიანთა ქონება. ამის მიზეზი, სავარაუდოდ, ამერიკაში საბირჟო ინდექსების დაცემა გახდა. საბირჟო ინდექსების მკვეთრ ვარდნას კი აშშ-ში საგადასახადო რეფორმაზე ოპტიმისტური მოლოდინის შემცირებას უკავშირებენ. მსოფლიოს 500-მა ყველაზე მდიდარმა ადამიანმა ორშაბათს ჯამში $114 მილიარდი დოლარი დაკარგა.

ბიძინა ივანიშვილმა Bloomberg-ის მიხედვით, ქონება  პოსტსაბჭოთა პერიოდში რკინის საბადოებსა და ქარხნებში, ბანკებსა და უძრავ ქონებაში ფულის დაბანდებით დააგროვა. 2003-2006 წლებში ქონების ნაწილი გაყიდა და 2012 წელს საქართველოს პრემიერ-მინისტრი გახდა, ერთი წლის შემდეგ კი თანამდებობა დატოვა. ბოლო ხუთი წლის განმავლობაში, ბიძინა ივანიშვილის ქონებამ მაქსიმუმს - 6.40 მილიარდ დოლარს 2013 წლის სექტემბერში მიაღწია, ყველაზე ქვედა ნიშნულზე - 5.29 მილიარდზე კი 2016 წლის ივლისში ჩამოვიდა.

Bloomberg მსოფლიოში ყველაზე მდიდარი 500 ადამიანის შემოსავლებზე ინფორმაციას მუდმივად აახლებს.