საქართველოს ყოფილი პრეზიდენტი მიხეილ სააკაშვილი ცხოვრებას ნიდერლანდებში აპირებს. ჰოლანდიური გამოცემა De Telegraaf ინფორმაციას მის ადვოკატზე ოსკარ ჰამერშტეინზე დაყრდნობით აქვეყნებს. ადვოკატის თქმით, სააკაშვილმა ქალაქ როტერდამში, იმიგრაციისა და ნატურალიზაციის სამსახურის ოფისს ბინადრობის უფლების მინიჭებისთვის მიმართა. როგორც გამოცემა წერს, საქართველოს ექსპრეზიდენტი და უკრაინაში ოპოზიციური პარტია „ახალი ძალების მოძრაობის“ ლიდერი ამსტერდამში აპირებს ცხოვრებას.
როგორც De Telegraaf წერს, ნიდერლანდების იუსტიციის სამინისტრომ დაადასტურა, რომ სააკაშვილმა ოჯახთან გაერთიანების მიზნით ბინადრობის უფლება მოითხოვა. იმიგრაციისა და ნატურალიზაციის სამსახურმა მას ამისი ნებართვა 2017 წლის დეკემბერშივე მისცა.
გასულ წელს მიხეილ სააკაშვილს პოროშენკომ უკრაინის მოქალაქეობა ჩამოართვა. ორშაბათს კი კიევში დააკავეს და პოლონეთში გააძევეს.