ფინანსთა სამინისტროს საგამოძიებო სამსახურის ინფორმაციით, „წითელი ცხვირების“ საქმეზე გამოძიება არ დაწყებულა და განცხადება უკვე ჩამოწერილია.
საუბარია აკა სინჯიკაშვილის განცხადებაზე, რომლითაც ის თეონა ბაღდავაძეს კამპანიის ფარგლებში შემოსული თანხების გაფლანგვაში ადანაშაულებს. პრესსამსახურის განცხადებით, საქმეში სისხლის სამართლის დანაშაულის ნიშნები არ აღმოჩნდა.
„როცა ჩვენთან განცხადება შემოდის, ჯერ შევისწავლით დეტალებს - არის თუ არა სისხლის სამართლის დანაშაულის ნიშნები, ჩვენი ქვემდებარე მუხლებია თუ არა და შემდეგ ვიღებთ გაადწყვეტილებას. ან ვიწყებთ გამოძიებას, ან სხვასთან ვამისამართებთ საქმეს, ან ვწყვეტთ საქმეზე მუშაობას. ამ შემთხვევაში შევისწავლეთ აკა სინჯიკაშვილის განცხადება და რადგან მასში სისხლის სამართლის დანაშაულის ნიშნები არ გამოიკვეთა, საქმეზე გამოძიება არ დაწყებულა, ეგრევე ჩამოიწერა ეს განცხადება“,- ამის შესახებ „ლიბერალს“ ფინანსთა სამინისტროს საგამოძიებო სამსახურის პრესსამსახურში განუცხადეს.
გასული წლის ზაფხულში აკა სინჯიკაშვილმა „წითელი ცხვირების“ საქველმოქმედო კამპანიის ორგანიზატორი თეონა ბაღდავაძე კამპანიის ფარგლებში შემოსული თანხების მითვისებაში დაადანაშაულა.
წითელი ცხვირების გაყიდვის მიზანი თავშესაფრის აშენება და ლეიკემიით დაავადებულთა მკურნალობა იყო. სინჯიკაშვილის თქმით, თეონა ბაღდავაძემ მას უთხრა, რომ 75000 ლარი შეგროვდა(გაიყიდა 15000 ცხვირი). თუმცა სინჯიკაშვილისთვის ეს თანხა მოსალოდნელზე ცნაკლები აღმოჩნდა, რადგან მისი თქმით, მთელ საქართველოს წითელი ცხვირი ეკეთა, ამასთან, ცხვირების გარდა მაისურებიც იყიდებოდა და კომპანიები სასპონსორო თანხებსაც იხდიდნენ.
„ეჭვი გამიჩნდა რომ თეონა ბაღდავაძემ ბევრი ფული მოგვპარა მთლიანად ქვეყანას, ჩემი აზრით მინიმუმ 35000 ლარი. დავადექი დღეს და ვუთხარი რომ ამ მოპარულ ფულს თუ არ დააბრუნებდა, გავაკეთებდი განცხადებას და საქმეს გადავცემდი საგამოძიებო ჯგუფს. თუ დააბრუნებდა, კაცურად არაფერს ვიტყოდი და სათქმელიც აღარაფერი იქნებოდა, ბოლო-ბოლო იქნებ, მართლა გამორჩა სადმე ეს ფული“,- წერდა სოციალურ ქსელში აკა სინჯიკაშვილი.
თეონა ბაღდავაძე კი აკა სინჯიკაშვილს ცილისწამებაში ადანაშაულებს და სასამართლოში საქმიანი რეპუტაციის შელახვისთვის უჩივის.
ინფორმაცია იმის შესახებ, რომ ფინანსთა სამინისტროს საგამოძიებო სამსახურმა სინჯიკაშვილის განცხადება ჩამოწერა, პირველად გამოცემა „ნეტგაზეთმა“ გაავრცელა.
