„ხელისუფლებას არ აქვს კომფორტი, რომ ბაზარზე არსებობს დამოუკიდებელი ტელევიზია. ჩვენ ვიგრძენით პატარა სიგნალები ამ მიმართულებით“,- ამის შესახებ „TV პირველის“ წამყვანმა, ნინო ჟიჟილაშვილმა კონფერენციაზე განაცხადა, რომელიც მედიაში მიმდინარე პროცესებს ეხება.
მისი თქმით, „TV პირველის“ თანამშრომლები კონფიდენციალურად შეხვდნენ არასამთავრობო ორგანიზაციებს.
„თუმცა ამ ეტაპზე პირდაპირი მტკიცებულებები არ გვაქვს და ამიტომ ეს შეხვედრა იყო დახურული. ამ ეტაპზე მინდა გითხრათ, რომ „TV პირველისთვის“ ეს ბარიერები მოხსნილია“.
შკითხვაზე, რა ტიპის სიგანი იყო ეს და იყო თუ არა ზეწოლა, ჟიჟილაშვილმა უპასუხა, რომ იყო „სიგნალი, რომ „TV პირველს“ შეეცვალა მომავალში შინაარსი. თუმცა ამ ეტაპზე ბარიერები აღარ გვაქვს“.
ტელეკომპანია „რუსთავი 2-ის“ დირექტორმა, ნიკა გვარამამ ფეისბუქგვერდზე „ტვ პირველთან“ დაკავშირებით დაწერა, რომ შესაძლოა, ხელისუფლებას ტელეკომპანიის სარედაქციო საქმიანობაში ჩარევის მცდელობა ჰქონდეს. მან ამავე სტატუსში აღნიშნა, რომ პრობლემებზე სალაპარაკოდ ტელეკომპანიის წარმომადგენლები არასამთავრობო ორგანიზაციების წარმომადგენლებს კონფიდენციალურად შეხვდნენ.
„ტვ პირველის“ მენეჯმენტსა არასამთავრობო ორგანიზაციების წარმომადგენლებს შორის შეხვედრა გასულ კვირაში გაიმართა. შეხვედრის შესახებ ინფორმაცია „ლიბერალს“ შეხვედრის რამდენიმე მონაწილემ დაუდასტურა. თუმცა ისინი კონკრეტულ დეტალებზე არ საუბრობენ.
როგორც „ლიბერალს“ ნინო ჟიჟილაშვილმა განუცხადა, ტელეკომპანიაში არაფერი შეცვლილა და ამ ეტაპზე არც მის დამოუკიდებლობასა და მიუკერძოებლობას ემუქრება საფრთხე.
„ტვ პირველზე არ შეცვლილა არაფერი. ვიდრე ეს გუნდი აქ ვმუშაობთ, სრული პასუხისმგებლობით შემიძლია გითხრათ, რომ სარედაქციო პოლიტიკა არის და დარჩება კრიტიკული, მიუკერძოებელი და დაბალანსებული. არხს ყოველდღე ემატება მაყურებელი, აქვს ნდობის მაღალი ხარისხი, მზარდი რეიტინგი და ამ ეტაპზეც და სამომავლოდაც ეს არის ჩვენი ერთადერთი საზრუნავი." - განუცხადა „ლიბერალს" ნინო ჟიჟილაშვილმა.
