რუსეთის საგარეო საქმეთა მინისტრმა სერგეი ლავროვმა განაცხადა, რომ რუსეთს იმედი ჰქონდა აღმოსავლეთ პარტნიორობა მის წინააღმდეგ მიმართული არ იქნებოდა. მაგრამ მასში შემავალ ზოგიერთ ქვეყანას სურს ამ ფორმატის რუსეთის წინააღმდეგ გამოყენება. ასე უპასუხა ლავროვმა მიუნხენის უსაფრთხოების 54-ე კონფერენციაზე ევროპარლამენტარ მაიკლ გალერის მიმართვას. მან რუსეთის საგარეო საქმეთა მინისტრს შეახსენა მისივე კომენტარი, რომ თითქოს ევროკავშირი ამ ქვეყნებს მასსა და რუსეთს შორის არჩევნის გაკეთების ულტიმატუმს უყენებს. გალერის თქმით, რუსეთისგან განსხვავებით ევროკავშირი საკუთარი მიზნის მისაღწევად სხვა ქვეყნებში ტანკებს არ აგზავნის. „ჩვენ ძალიან განსხვავებული დონე გვაქვს ურთიერთობის ექვსივე ქვეყანასთან. არ დამეთანხმებით, რომ ჩვენ მათ სურვილებზე ვრეაგირებთ და არაფერს ვაიძულებთ და თუ ვინმე არ გააფორმებს ჩვენთან შეთანხმებას, ტანკებს არ ვაგზავნით“, - მიმართა ლავროვს ევროპარლამენტარმა და დასძინა, რომ რუსეთის გამო, აღმოსავლეთ პარტნიორობის ქვეყნების ნაწილი ევროკავშირთან ურთიერთობებს ვერ აღრმავებენ.
სერგეი ლავროვმა კი პასუხად განაცხადა, რომ ასეთი დამოკიდებულებით იგონებენ რუსეთიგან მომავალ საფრთხეებს. მან კი მხოლოდ ის თქვა, რომ იმედოვნებდა აღმოსავლეთ პარტნიორობა რუსეთის წინააღმდეგ მიმართული არ იქნებოდა, მაგრამ მისი ზოგიერთი ქვეყანა ამას მაინც ცდილობს. „აი, ასე იგონებენ რუსულ საფრთხეებს. თქვენი შეკითხვა დაიწყო იმის მტკიცებით, თითქოს ვთქვი, რომ აღმოსავლეთ პარტნიორობას ამ ქვეყნების რუსეთისგან ჩამოსაშორებლად იყენებენ. ჩემი პოზიცია სხვანაირი იყო - როდესაც აღმოსავლეთ პარტნიორობა ყალიბდებოდა, ჩვენ გვარწმუნებდნენ, რომ ის რუსეთის წინააღმდეგ არ იქნებოდა მიმართული. ვიმედოვნებდი, ეს დანაპირები შესრულდებოდა, არადა აღმოსავლეთ პარტნიორობის ზოგიერთ ქვეყანას ნამდვილად სურს ამ ფორმატის რუსეთის წინააღმდეგ გამოყენება“, - განაცხადა ლავროვმა.
ევროკავშირის აღმოსავლეთ პარტნიორობის ქვეყნებში საქართველო, მოლდავეთი, ბელორუსი, უკრაინა, სომხეთი და აზერბაიჯანი შედიან.