საქართველოს ეკონომიკისა და მდგრადი განვითარების მინისტრი დიმიტრი ქუმსიშვილი მსოფლიო ბანკის დელეგაციას შეხვდა.

შეხვედრაზე მინისტრმა და მსოფლიო ბანკის ეკონომისტმა ევროპისა და ცენტრალური აზიის ქვეყნების რეგიონში ჰანს ტიმერმა საქართველოში კრიპტოვალუტისა და blockchain-ის ტექნოლოგიების განვითარების საკითხი განიხილეს.

ეკონომიკისა და მდგრადი განვითარების სამინისტროს ინფორმაციით, მსოფლიო ბანკის წარმომადგენელთა მხრიდან აღინიშნა, რომ საქართველოში ძალიან კარგად არის განვითარებული კრიპტოვალუტის – ბიტკოინის წარმოება და ზოგადად blockchain-ის ტექნოლოგიები. მეტიც, ამ მიმართულებით, ქვეყანა მსოფლიოში ერთ-ერთი ლიდერია.

სამინისტროს ინფორმაციით, მსოფლიო ბანკის დელეგაციის წარმომადგენლები საქართველოში აღნიშნული ტექნოლოგიების მდგომარეობით,  განვითარების ხედვითა და სამომავლო პერსპექტივით დაინტერესდნენ.

მსოფლიო ბანკის მისია შეხვედრებს გამართავს სხვა სამთავრობო უწყებებსა და კერძო სექტორში, სადაც blockchain-ის ტექნოლოგიები არის დანერგილი.