თბილისის საქალაქო სასამართლომ ბრალდების მხარის მტკიცებულებები გაიზიარა და ყოფილი მეუღლის მიმართ თვითმკვლელობამდე მიყვანაში ბრალდებული გ.კ. სისხლის სამართლის კოდექსის 111-115-ე მუხლით დამნაშავედ ცნო.
მთავარი პროკურატურის ინფორმაციით, სასამართლოში წარდგენილი მტკიცებულებებით დადასტურდა, რომ ბრალდებულმა 2017 წლის 18 თებერვალს, ღამის საათებში, თბილისში, ყოფილ მეუღლეს ა.ლ.-ს სასტიკად მოეპყრა და თავის არეში მრავლობითი დაზიანება მიაყენა. აღნიშნულის შემდგომ ა.ლ.-მ სააბაზანო ოთახში ქამრის მსგავსი საგნის გამოყენებით თავი ჩამოიხრჩო. „სამართალდამცველებმა გ.კ. 2017 წლის 13 მაისს თბილისში დააკავეს. მას ბრალდება სისხლის სამართლის კოდექსის 111-115-ე მუხლით (ოჯახის ერთი წევრის მიერ სხვა წევრის თვითმკვლელობამდე მიყვანა სასტიკი მოპყრობით) წარედგინა.“ - წერს პროკურატურა.
თბილისის საქალაქო სასამართლომ გ.კ. დამნაშავედ ცნო და სასჯელის სახით 3 წლით თავისუფლების აღკვეთა განუსაზღვრა.
