გორში, ხარების ეკლესიაში ხელყუმბარა იპოვეს. როგორც „ლიბერალს“ შსს-ში უთხრეს, მას ზედ წერილიც ჰქონდა მიმაგრებული, რომლითაც მფლობელი ხელყუმბარის სამართალდამცველებისთვის გადაცემას მოითხოვდა. როგორც ის წერდა, ხელყუმბარას 2008 წლის ომის შემდეგ ფლობდა და გადაწყვიტა, პოლიციისთვის ანონიმურად გადაეცა.
შსს-ს ინფორმაციით, ამ ფაქტზე გამოძიება სისხლის სამართლის კოდექსის 236-ე მუხლის მეორე ნაწილით დაიწყო. ეს გულისხმობს ცეცხლსასროლი იარაღის (გარდა სანადირო გლუვლულიანი ცეცხლსასროლი იარაღისა (თოფისა)), საბრძოლო მასალის, ფეთქებადი ნივთიერების ან ასაფეთქებელი მოწყობილობის მართლსაწინააღმდეგოდ არაერთგზის შეძენას, შენახვას, ტარებას, დამზადებას, გადაზიდვას, გადაგზავნას ან გასაღებას. ისჯება თავისუფლების აღკვეთით ვადით ოთხ წლამდე.
