განათლების მინისტრის მიხეილ ჩხენკელის თქმით, პირველ ეტაპზე სკოლაში ხელფასი მხოლოდ წამყვან და მენტორ მასწავლებელბს მოემატათ. ეს პედაგოგების წახალისების მიზნით გაკეთდა, მაგრამ მისი მიზანია, მოკლე ვადაში არა მარტო მათ, ყველა პედაგოგს და ტექნიკურ პერსონალსაც გაეზარდოს ანაზღაურება. ჩხენკელმა კომენტარი იმ კითხვის საპასუხოდ გააკეთა, რომ პედაგოგები მხოლოდ წამყვანი და მენტორი მასწავლებლებისთვის ხელფასების მომატების გამო უკმაყოფილებას გამოთქვამენ.
„გვინდა, წავახალისოთ მასწავლებელი, რათა გადავიდეს შემდგომ საფეხურზე, რომ მან აიმაღლოს კვალიფიკაცია, შესაბამისად, ეს მათთვისაც არის სტიმული, რომ მიაღწიონ ამ საფეხურს. მინდა გითხრათ, რომ ზოგადად, მასწავლებლის ანაზღაურების საკითხი ძალიან სერიოზული თემაა და ჩემი პირადი აზრია, რომ უკლებლივ ყველა მასწავლებლის ხელფასი უნდა იყოს უფრო მაღალი და ამ მიმართულებით ჩვენ მაქსიმალურად ვმუშაობთ, რომ მივაღწიოთ ამ მიზანს საკმაოდ მოკლე ვადებში, რომ ყველა მასწავლებლის ხელფასი გაიზრდოს“, - განაცხადა მიხეილ ჩხენკელმა.
განათლების მინისტრის აზრით, პედაგოგებთან ერთად მნიშვნელოვან როლს ასრულებს ტექნიკური პერსონალიც, რომელსაც სკოლაში საკმაოდ მძიმე სამუშაო აქვს. „საკმოდ რთულია როგორც პედაგოგის, ასევე ტექნიკური პერსონალის მოღვაწეობა სკოლაში, შესაბამისად, კიდევ ერთხელ ვამბობ, რომ სკოლაში დასაქმებული ყველა ადამიანის - პედაგოგის, ადმინისტრაციის და ტექნიკური პერსონალის ხელფასებმა უნდა მოიმატონ“, - განაცხადა ჩხენკელმა.
