როგორც მუსტაფა ემრე ჩაბუქის ადვოკატი სოსო ბარათაშვილი აცხადებს, ჩაბუქი შიშობს, რომ არსებობს მასზე თავდასხმის, გატაცებისა და მისი სიცოცხლის ხელყოფის საფრთხე, რის გამოც, მთავარ პროკურორს დაცვის სპეციალურ პროგრამაში ჩართვის შესახებ მიმართავენ.
ადვოკატის თქმით, აზერბაიჯანში დაფიქსირდა შემთხვევა, როცა მსგავსი ბრალდებით საექსტრადიციო პატიმრობიდან გათავისუფლებული პირი გაიტაცეს და თურქეთში აღმოჩნდა.
„საქართველოს მთავარ პროკურორს მივმართეთ მუსტაფა ემრე ჩაბუქის დაცვის სახელმწიფო პროგრამაში ჩართვის თაობაზე. როგორც ცნობილია, მისი მეუღლე და ორი არასრულწლოვანი შვილი ჩართულნი არიან ამ პროგრამაში. ჩაბუქის გათავისუფლების შემდეგ კვლავ გაჩნდა სოციალურ ქსელებში ინფორმაცია, რომელიც გვაფიქრებინებს, რომ არსებობს მისი სიცოცხლის ხელყოფის საფრთხე, ამიტომ ვითხოვთ დაცვის სპეციალურ პროგრამაში ჩართვას.
არსებობს საგანგაშო პრეცედენტი, როდესაც აზერბაიჯანში ანალოგიური ბრალდებით საექსტრადიციო პატიმრობიდან გათავისუფლებული პირი გაიტაცეს და ის აღმოჩნდა თურქეთში“, - განაცხადა სოსო ბარათაშვილმა.
მუსტაფა ემრე ჩაბუქმა დაცვის სახელმწიფო პროგრამაში ჩართვის მოთხოვნით, დღეს პროკურატურაში განცხადება შეიტანა.
