ესპანეთში ბილბაოს „ატლეტიკთან“ მატჩამდე მოსკოვის „სპარტაკის“ გულშემატკივრებმა არეულობა მოაწყვეს, რასაც პოლიციელი ემსხვერპლა.

ადგილობრივი პოლიციის თქმით, 51 წლის ოფიცერმა ინოსენსიო ალონსო გარსიამ გულის შეტევა იმ დროს მიიღო, როცა რუსი „ულტრასების“ ჩხუბის შეჩერებას ცდილობდა. ქალაქში ფანებს შორის დაპირისპირების ჩასახშობად ხელისუფლებას 500-ზე მეტი პოლიციელის მობილიზება დასჭირდა.

ინტერნეტში გავრცელებულ ვიდეოკადრებში ჩანს, როგორ ესროდნენ ერთმანეთს გულშემატკივრები მაშხალებს. პოლიციის თქმით, როგორც ჩანს, რუსეთიდან ფანების ნაწილი დაპირისპირებისთვის მომზადებული ჩამოვიდა, რადგან თან დანები და ხელნაკეთი იარაღები ჰქონდათ.

შემთხვევას გამოეხმაურა ესპანეთის პრემიერ-მინისტრი მარიანო რახოი და ძალადობა დაგმო. „დიდი მადლობა იმ ხალხს, ვინც ასე ცდილობს დაიცვას სპორტის მოყვარული ადამიანები“, - დაწერა რახოიმ Twitter-ზე. პოლიციელის ოჯახის წევრებს თანაგრძნობა გამოუცხადა ადგილობრივმა პოლიციამ, ბილბაოს „ატლეტიკმა“ და ესპანეთის ფეხბურთის ფედერაციამ კი ძალადობა დაგმეს.

ბილბაოს „ატლეტიკმა“ ორმატჩიან დაპირისპირებაში 4-3 გაიმარჯვა და ევროპის ლიგის 1/8 ფინალში გავიდა.

ფოტო: EPA