ქართული მართვის მოწმობებისთვის საერთაშორისო ძალის მინიჭების საკითხზე შსს ამ ეტაპზე მოლაპარაკებებს სამ ქვეყანასთან აწარმოებს. 

შს მინისტრის მოადგილეm, ნათია მეზვრიშვილმა „ინტერპრესნიუსთან“ განაცხადა, რომ  უახლოეს პერიოდში ესპანეთში, იტალიასა და უკრაინაში ქართული მართვის მოწმობის მქონე მძღოლებს 6-თვიანი ვადის გასვლის შემდეგაც შეეძლებათ, კვლავ ქართული მართვის მოწმობით ისარგებლონ და მათ ადგილობრივი მართვის მოწმობის ასაღებად გამოცდის ჩაბარება აღარ მოუწიოთ. 

„პროცედურები რამდენიმე ქვეყანასთან დაწყებული გვაქვს. ახლა ძალიან აქტიურ ფაზაში ვართ. რეალურად, ასოცირების შეთანხმების მიხედვით, დრო გვაქვს 2018 წლის სექტემბრამდე და ამ დროში აუცილებლად ჩავჯდებით. აქ მიდის ორი მიმართულებით მუშაობა. ერთი - მართვის მოწმობის გამოცდის რეალურ სივრცეში გადმოტანა, ამისთვის უკვე ინფრასტრუქტურის მოწყობა და მარშრუტების იდენტიფიცირება მიმდინარეობს და მეორე მიმართულება არის ქართული მართვის მოწმობების უცხოეთში აღიარება. ახლა იდენტიფიცირებული გვაქვს სამი ქვეყანა, რომლებთანაც მუშაობა ინტენსიურად მიმდინარეობს. ესენია: ესპანეთი, იტალია და უკრაინა“, - განაცხადა მეზვრიშვილმა.