დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელის, ამირან გამყრელიძის ინფორმაციით, თამბაქოს მიერ გამოწვეული ზიანით საქართველოში ყოველწლიურად 11 400 ადამიანი იღუპება, აქედან 2 900 პასიური მწეველია. მისი თქმით, თამბაქო 21-ე საუკუნის ყველაზე დიდ მკვლელადაა აღიარებული. გამყრელიძე იმ დაავადებებზე საუბრობს, რომელსაც თამბაქოს მოწევა იწვევს. 

„თამბაქოზე მთელ მსოფლიოში მოდის სიკვდილიანობის დაახლოებით 10%, ანუ 7 მილიონი ადამიანი ყოველწლიურად კვდება თამბაქოთი გამოწვეული ზიანით. საქართველოში ეს ციფრი პროცენტულად უფრო მაღალი გვაქვს. ეს გახლავთ ყველაზე უფრო დიდი რისკფაქტორი დღეს არაგადამდები დაავადებების განვითარებისა, როგორიცაა: გულ-სისხლძარღვთა სისტემის დაავადებები, გულის იშემიური დაავადება, ინსულტი. თამბაქო, ასევე გახლავთ სიმსივნური დაავადებების გამოწვევის პირველი მიზეზი. ამიტომ 2003 წელს ჯანმრთელობის მსოფლიო ორგანიზაციამ მიიღო თამბაქოს ჩარჩო კონვენცია, რომელსაც ჩვენც მივუერთდით. აუცილებელია კონვენციის ყველა მუხლი შესრულდეს",- განაცხადა გამყრელიძემ. 

ის იმედს გამოთქვამს, რომ თამბაქოს კონტროლის შესახებ პირველი მაისიდან ამოქმედებული საკანონმდებლო ნორმები ეფექტიანი იქნება. გამყრელიძის თქმით, ქვეყანამ თანდათანობით უნდა გაზარდოს გადასახადები თამბაქოზე.