„მშვიდობა ომზე მეტია“ - არჩილ ტატუნაშვილის მიმართ სოლიდარობისა და ოკუპაციის წინააღმდეგ თბილისში, თავისუფლების მოედანზე აქცია იმართება.
აქციის მონაწილეებმა ოკუპირებულ ცხინვალში დაღუპული არჩილ ტატუნაშვილის ხსოვნას წუთიერი დუმილით პატივი მიაგეს და ოკუპაცია გააპროტესტეს.
„ჩვენი ხელისუფლება ითხოვს მოკლული ტატუნაშვილის ცხედრის დაუყოვნებლივ გადმოსვენებას, რომელიც ოკუპანტმა მხარემ მძევლად ჩაიგდო ხელში. დიახ, ცხედარი ჰყავთ მძევლად. გარდა ამისა, დაკავებული ჰყავთ საქართველოს ორი მოქალაქე, რომელთაც არ ათავისუფლებენ და არ გადმოგვმცემენ.
მივიჩნევთ, რომ აღნიშნული ფაქტს უნდა მიეცეს მკაცრი რეაგირება, როგორც სახელმწიფოსგან ასევე, სამოქალაქო საზოგადოებისგან, რადგან ეს არის დარტყმა საქართველოს სახელმწიფოსა და ჩვენს მშვიდობიან არჩევანზე. სწორედ ამიტომ, აქციის მიზანია, დავაფიქსიროთ საქართველოს მოქალაქეების პოზიცია მთელი მსოფლიოს თვალში, რომ ჩვენ მშვიდობისა და თავისუფლების მხარეს ვდგავართ, ისინი კიდევ გვპასუხობენ ომითა და ძალადობით“, - აცხადებენ აქციის ორგანიზატორები.
აქციის სოლიდარობის მიზნით 2 საათის განმავლობაში დაიკეტება კომერციული ობიექტები, რომლებმაც თავიანთ მომხმარებლებს აქციაზე მისვლისკენ მოუწოდეს.
ბარებისა და რესტორნების სია, რომლებიც ოკუპაციის წინააღმდეგ აქციისთვის 2 საათით დაიკეტებიან
აქციას სოლიდარობას უცხადებს საქართველოს 12 ქალაქი, სადაც მსგავსი აქციები გაიმართება.
არჩილ ტატუნაშვილი ახალგორიდან 22 თებერვალს გაიტაცეს. 23 თებერვალს კი სამხრეთ ოსეთის დე ფაქტო რესპუბლიკის უშიშროების კომიტეტმა განაცხადა, რომ ის დაკავების შემდეგ გულის უკმარისობით ცხინვალის საავადმყოფოში გარდაიცვალა.
სახალხო დამცველისათვის მიწოდებული ინფორმაციით, არჩილ ტატუნაშვილი ცხინვალის საავადმყოფოში უკვე გარდაცვლილი მიიყვანეს და სამედიცინო პერსონალის შეფასებით, დაზიანებები მიანიშნებდა, რომ იგი ნაცემი იყო.
ტატუნაშვილის ოჯახს ექსპერტიზის დასკვნამდე ცხედრის გადმოცემაზე უარი უთხრეს.
