სკოლების ინფრასტრუქტურაზე ზრუნვა ადგილობრივი თვითმმართველობების უფლებამოსილებაში გადავა.
ახალი სკოლების მშენებლობის პროცესი, არსებული სკოლების რეაბილიტაციის და რემონტის პროცესი დელეგირებული იქნება, განათლებისა და მეცნიერების სამინისტროს ნაცვლად, ადგილობრივ თვითმმართველობებზე. მუნიციპალიტეტები თავად შეისწავლიან სკოლების საჭიროებებს, განსაზღვრავენ პრიორიტეტებს და გამოაცხადებენ ტენდერს ახალი პროექტების განხორციელების მიზნით.
როგორც „ლიბერალს“ საგანმანათლებლო და სამეცნიერო ინფრასტრუქტურის სამსახურში განუცხადეს, როდესაც ინფრასტრუქტურული პროექტები შესრულდება, შესაბამისი ფინანსური დოკუმენტაციის წარდგენის შემდგომ, სამინისტროდან თანხა ადგვილობრივ თვითმმართველობებს გადაერიცხებათ.
აქამდე აღნიშნულ საქმიანობას ცენტრალიზებულად განათლებისა და მეცნიერების სამინისტროს სსიპ-ი საგანმანათლებლო და სამეცნიერო ინფრასტრუქტურის სამსახური ახორციელებდა.
უკვე ჩატარდა შეხვედრები ადგილობრივ თვითმმართველობებში, სადაც სკოლის დირექტორებმა, რესურს ცენტრის ხელმძღვანელებმა და მუნიციპალიტეტის თანამშრომლებმა სკოლების ინფრასტრუქტურული საჭიროებები განსაზღვრეს.
„ლიბერალი“ თელავის მერიას დაუკავშირდა, სადაც განაცხადეს, რომ სკოლების ინფრასტრუქტურული საჭიროებების მოკვლევის ეტაპი უკვე დასრულებულია. როგორც მერიის ინფრასტრუქტურის სამსახურის უფროსმა მალხაზ ბაღუაშვილმა გვითხრა, განისაზღვრა იმ სკოლების სია, სადაც ინფრასტრუქტურული სამუშაოები მიმდინარე წლის განმავლობაში უნდა ჩატარდეს. ეს სკოლებია,- ვარდისუბნის საჯარო სკოლა, ართანის საჯარო სკოლა, ლაფანყურის საჯარო სკოლა, ქვემო ხუჯაშნისა და კურდღელაურის საჯარო სკოლები.
საქართველოს განათლებისა და მეცნიერების მინისტრის მიხეილ ჩხენკელის განმარტებით, ეს ცვლილება დეცენტრალიზაციითაა განპირობებული. სტანდარტების დაკმაყოფილების კუთხით პროცესს მონიტორინგს განათლებისა და მეცნიერების სამინისტრო გაუწევს.
