საქართველოს სოფლის მეურნეობის და მსუბუქი მრეწველობის პროფკავშირის განცხადებით, მათთვის მიუღებელია „აგარის შაქრის კომპანიის“ ადმინისტრაციის მხრიდან გაჟღერებული უპასუხისმგებლო განცხადება - ქარხნის გარშემო განვითარებულ მოვლენებთან დაკავშირებით".
"სწორედ, აგარელი მშრომელები იცავდნენ აღნიშნულ საწარმოს 90 იანი წლების არეულობის პერიოდში და შეინარჩუნეს საკუთარი სამუშაო სივრცე უნიკალურად". - წერია განცხადებებში.
"2017 წლის ოქტომბერში, აღნიშნულ ქარხანაში კონკრეტულად კი ნედლეული საწყობში გაჩნდა ხანძარი, რომლის ჩაქრობაც სწორედ დასაქმებულებმა, საკუთარი სიცოცხლის რისკის ფასად შეძლეს. კომპანიას ასეთი არაერთი ფაქტი ახსოვს, თუმცა იმის ნაცვლად, რომ დასაქმებულებს რეალური პრობლემის გადაჭრის გზები შესთავაზოს მათ სოციალურ პასუხისმგებლობაში ეჭვი შეაქვს.
სამწუხაროა ის ფაქტიც, რომ კომპანიის მენეჯმენტმა საჯაროდ, ოფიციალური განცხადება მხოლოდ მას შემდეგ გააკეთა რაც დასაქმებულებმა და პროფკავშირმა ქარხნის ამუშავების ალტერნატიულ ხედვაზე დაიწყეს მსჯელობა. თუ კომპანია აღიარებს, რომ ჩვენი ინტერესები ერთმანეთს ემთხვევა, მაშინ უნდა გადადგას ქმედითი ნაბიჯები და რა ენთუზიაზმითაც „სარეზერვო სახანძრო მანქანის“ გამოყოფას სთხოვს ხელისუფლებას, იგივე ენთუზიაზმით დადგეს დასაქმებულთა გვერდში და ქარხნის ამუშავებისთვის ბრძოლა დაიწყოს.
მივიჩნევთ, რომ ასეთი სახის განცხადებები მხოლოდ გაამწვავებს პროტესტს და გააღრმავებს უნდობლობას დასაქმებულთა და კომპანიას შორის". - ვკითხულობთ საქართველოს სოფლის მეურნეობის და მსუბუქი მრეწველობის პროფკავშირის განცხადებაში.
