ბათუმში, საიათნოვას N4 ნომერთან იპოთეკური სესხით დაზარალებულები მივიდნენ და აღსრულების სამსახურის თანამშრომლებს ტერიტორიის დატოვებას სთხოვენ. სამართალდამცველებმა 82 წლის ალექსანდრა ტერუნი გამოასახლეს. ინფორმაციას „საზოგადოებრივი მაუწყებელი“ ავრცელებს.
როგორც „გამოცემა „ბათუმელები“ წერს, 82 წლის ალექსანდრა ტერუნი საიათნოვას 4-ში მდებარე სახლის მეორე სართულზე ორი დღის წინ ამწით შევიდა: „იგი ამ ბინაში 1983 წლიდან ცხოვრობდა, ქუჩაში კი მას შემდეგ დარჩა, რაც მისმა შვილიშვილმა წლების წინ სესხი აიღო და ბინა იპოთეკით დატვირთა. შვილიშვილი საზღვარგარეთ წავიდა, ბინა მეზობელმა იყიდა, ვისთანაც მოხუცს სასამართლოში დავა აქვს. მოხუცის თქმით, ის არაერთხელ გახდა ამ ოჯახისგან ფიზიკური ძალადობის მსხვერპლი“.
მათივე ცნობით, პოლიციას ჩაკეტილი აქვს შესასვლელი ჭიშკარი და არავის უშვებს, მათ შორის, 82 წლის მოხუცის მინდობილ პირს. ალექსანდრა სახლის ეზოში ზის და ამბობს, რომ სახლს არ დატოვებს.
ფოტო: „ბათუმელები“