კალაურის ფერმის მწყემსი სამართალდამცველებს ძალადობაში ადანაშაულებს. 29 წლის ალექსი ტარაშენკოვი ტელეკომპანია „რუსთავი 2-თან“ საუბარში ჰყვება, რომ ღამის 02:00 საათზე ფერმაში პოლიციელები მოპარული ძაღლისა და უკანონო იარაღის ძებნის მოტივით შევიდა და მისგან აღიარებითი ჩვენება მოითხოვა.
მწყემსის თქმით, სამართალდამცველები მას იმის აღიარებას სთხოვდნენ, რაც არ ჩაუდენია, უარის შემდეგ კი პოლიციის თანამშრომლებმა მას სკამი ჩაარტყეს და ცეცხლსასროლი იარაღით ემუქრებოდნენ.
„პოლიციელებმა მცემეს. ორი პოლიციელი მირტყამდა. ერთმა იარაღი ამოიღო და პირში დამიმიზნა, უნდა მოგკლაო," - ჰყვება მწყემსი.
ნაცემი მწყემსი დილით ფარმის მეპატრონემ იპოვა. ფერმის მეპატრონე მალხაზ ამონაშვილი „კურიერთან“ ამბობს, რომ ერთ-ერთი სამართალდამცავი ადრეც ყოფილა მათთან ჩხრეკაზე.
„სამართალდამცავი ლევან მაისურაძე ჩხრეკაზე რომ იყო მოსული, ვეუბნებოდი, რაც არ არის რას ეძებ-თქო. არ არისო და ქუჩაში ჯიბეებს წამლით გაგივსებთო, ასე გვითხრა," - ამბობს მალხაზ ამონაშვილი.
შინაგან საქმეთა სამინისტროში პოლიციელების მონაწილეობას მწყემსის ცემაში უარყოფენ და ამბობენ, რომ არც ფერმაში და არც იმ ტერიტორიაზე იმ დროს არც ერთი პოლიციელი არ ყოფილა.
პროკურატურამ საქმე სამსახურებრივი უფლებამოსილების გადამეტების მუხლით აღძრა.
