საქართველოს პარლამენტის თავმჯდომარის ირაკლი კობახიძის თქმით, სასამართლოს სისტემის რეფორმის ფარგლებში ახალი კანონპროექტები შემუშავდება.
„ჩვენ კვლავ შევხვდებით აპრილის დასაწყისში. შეხვედრაზე დეტალურად განიხილება წინადადებები კანონპროექტებისთვის, რომლის საფუძველზეც კიდევ უფრო უნდა განმტკიცდეს საქართველოში სასამართლოს დამოუკიდებლობა და უნდა გაუმჯობესდეს სასამართლო სისტემის ეფექტიანობა“, - განაცხადა საქართველოს პარლამენტის თავმჯდომარემ, ირაკლი კობახიძემ სასამართლო რეფორმის მთავარი მიმართულებების სამუშაო ჯგუფის მეხუთე შეხვედრის დასრულების შემდეგ.
პარლამენტის თავმჯდომარემ კონსტრუქციულად შეაფასა შეხვედრა, რომელშიც მონაწილეობდნენ როგორც სასამართლო კორპუსისა და მთავრობის წარმომადგენლები, ასევე საერთაშორისო პარტნიორები და სამოქალაქო სექტორის წარმომადგენლები. კობახიძის თქმით, მონაწილეები შეთანხმდნენ, რომ მომდევნო შეხვედრისთვის სასამართლო რეფორმასთან დაკავშირებით, კონკრეტულ წინადადებებს წარმოადგენენ.
„ჩვენ ვთხოვეთ თითოეულ მონაწილეს, შემდეგ შეხვედრამდე, აპრილის დასაწყისში, წარმოადგინონ კონკრეტული წინადადებები იმ ოთხ ძირითად საკითხთან დაკავშირებით, რომელიც გასათვალისწინებელია სასამართლო რეფორმის ფარგლებში“, - განაცხადა ირაკლი კობახიძემ.
