„რადიო თავისუფლების“ კორესპონდენტის ცნობით, ერგნეთი საგუშაგოსთან მოძრაობა გააქტიურდა, მისივე ინფორმაციით, ერგნეთში იმყოფება შერიგებისა და სამოქალაქო თანასწორობის საკითხებში სახელმწიფო მინისტრის წარმომადგენელი. ადგილზე ელოდებიან „წითელ ჯვარსაც“.
ოსური სააგენტო Рес-ის ცნობით, არჩილ ტატუნაშვილის ცხედარს საქართველოს ხელისუფლების მიერ კონტროლირებულ ტერიტორიაზე დღეს, 20 მარტს გადმოასვენებენ წითელი ჯვრის მისიის დახმარებით.
არჩილ ტატუნაშვილი ახალგორიდან 22 თებერვალს გაიტაცეს. 23 თებერვალს კი სამხრეთ ოსეთის დე ფაქტო რესპუბლიკის უშიშროების კომიტეტმა განაცხადა, რომ ის დაკავების შემდეგ გულის უკმარისობით ცხინვალის საავადმყოფოში გარდაიცვალა.
სახალხო დამცველისათვის მიწოდებული ინფორმაციით, არჩილ ტატუნაშვილი ცხინვალის საავადმყოფოში უკვე გარდაცვლილი მიიყვანეს და სამედიცინო პერსონალის შეფასებით, დაზიანებები მიანიშნებდა, რომ იგი ნაცემი იყო.
ფოტო: რადიო თავისუფლება