მთავარი პროკურორის ირაკლი შოთაძის განცხადებით, თემირლან მაჩალიკაშვილის სახლიდან ამოღებული ხელყუმბარის განადგურებით „არაფერი განსაკუთრებული არ მომხდარა".
ირაკლი შოთაძე ამბობს, რომ ხელყუმბარაზე ჩატარდა ყველა საჭირო საგამოძიებო მოქმედება და ექსპერტიზა.
„ხელყუმბარაზე ჩატარებულია ყველა ექსპერტიზა, რისი აუცილებლობაც არსებობდა. ჩატარდა ყველა სამართლებრივი და საექსპერტო პროცედურები, როგორც ყველა მსგავს შემთხვევაში. ამ შემთხვევაში არაფერი განსაკუთრებული არ მომხდარა. რაც შეეხება ექსპერტიზის დასკვნებს და სხვა მტკიცებულებებს, ამაზე დეტალურად ვისაუბრებთ მხოლოდ მას შემდეგ, რაც ამოვწურავთ საგამოძიებო მოქმედებებს, დავასრულებთ გამოძიებას, მივიღებთ შესაბამის სამართლებრივ გადაწყვეტილებას და მხოლოდ ამის შემდგომ ვისაუბრებთ სისხლის სამართლის საქმეში არსებულ მტკიცებულებაზე, მათ შორის ექსპერტიზის დასკვნებზე", - განაცხადა ირაკლი შოთაძემ.
