შიინაგან საქმეთა სამინისტროში „ლიბერალს“ უთხრეს, რომ „რუსთავი 2- თან“ მომხდარი ინციდენტის ფაქტზე მიმდინარე გამოძიების ფარგლებში გუშინ სანდრო ბრეგაძე გამოიკითხა, რის შემდეგაც მან პოლიციის შენობა დატოვა.
„თუმცა გამოძიება გრძელდება და გამოძიების ინტერესებიდან გამომდინარე, უახლოეს დღეებში მას კვლავ დაიბარებენ პოლიციაში, გამოსაკითხად", - ამბობენ შსს-ში.
„ქართული მარშის" ერთ-ერთი ლიდერი სანდრო ბრეგაძე ღუდუშაურის სახელობის კლინიკიდან გუშინ გაწერეს და პოლიციის განყოფილებაში დაკითხეს.
სამაუწყებლო კომპანია „რუსთავი 2"-თან პოლიციამ ქართული მარშის 6 წევრი დააკავა. ტელეკომპანია „რუსთავი 2-თან“ „ქართული მარშის“ აქციის მონაწილეები ადმინისტრაციულ სამართალდარღვევათა კოდექსის 166-ე და 173-ე მუხლებით დააკავეს. შეკრებილმა მოქალაქეებმა ფიზიკური შეურაცხყოფა მიაყენეს „რუსთავი 2-ის“ ჟურნალისტს და დააზიანეს ტელეკომპანიის მანქანა, რის გამოც, პოლიციამ 6 პირი დააკავა. ამის შესახებ განცხადება შსს-მ გაავრცელა.