თბილისის საქალაქო სასამართლო „ქართული მარშის ” წევრებისთვის აღკვეთის ღონისძიების შეფარდებაზე ოფიციალურ ინფორმაციას ავრცელებს.
"სასამართლომ, მხარეთა ახსნა-განმარტებების მოსმენის შემდგომ მიიჩნია, რომ სახეზე იყო აღკვეთის ღონისძიების გამოყენების როგორც ფაქტობრივი, ისე ფორმალური საფუძვლები. კერძოდ, სასამართლომ მხედველობაში მიიღო ის გარემოება, რომ საქმე ეხება ძალადობრივი ხასიათის დანაშაულის შესაძლო ჩადენას, საქმეზე მიმდინარეობს გამოძიება და დასადგენია საქმისთვის მნიშვნელოვანი გარემოებები, გამოსაკითხია სხვადასხვა პირები, ამდენად მტკიცებულებათა მოპოვებისათვის და მართლმსაჯულების განხორციელებისათვის ხელშეშლის საფრთხეთა გათვალისწინებით, სასამართლომ აღკვეთის ღონისძიების სახედ ბრალდებულებს პატიმრობა განუსაზღვრა.
საქმეზე წინასასამართლო სხდომა 2018 წლის 8 მაისს, 12:00 საათზე გაიმართება.”,-ნათქვამია თბილისის საქალაქო სასამართლოს მიერ გავრცელებულ განცხადებაში.
შეგახსენებთ, რომ თბილისის საქალაქო სასამართლომ „ქართული მარშის“ წევრებს,- ლადო სადღობელაშვილს, ლუკა ნაცვლიშვილს, გიორგი ონიანს, ბექა რევაზიშვილს, ირაკლი დოლენჯაშვილისა და მიხეილ ამისულაშვილს აღმკვეთის სახით ორთვიანი წინასწარი პატიმრობა შეუფარდა.
