სასჯელაღსრულების სამინისტროს იურიდიული დეპარტამენტის უფროსის ალექსანდრე დარახველიძის თქმით, ე.წ. უდოს კომისიამ გათავისუფლებაზე ვეფხია ბაქრაძეს 6-ჯერ უთხრა უარი. ბაქრაძე 13 აპრილს ბარნოვის ქუჩაზე ახალგაზრდა ქალის მკვლელობაშია ბრალდებული.
„ჩავთვალეთ, რომ არ აკმაყოფილებდა იმ კრიტერიუმებს, რა კრიტერიუმებიც არის დადგენილი. დანაშაულის ხასიათი, ეს არის ის კრიტერიუმი, რასაც ძალიან დიდ ყურადღებას უთმობს საბჭო. ეს არის მისი წარსულში დანაშაულის ჩადენის ფაქტები, ასევე დაწესებულებაში ქცევა“, - თქვა დარახველიძემ.
დარახველიძის განცხადებით, ე.წ. უდოს კომისია დიდ ყურადღებას უთმობს რისკის საკითხსაც, თუ რამდენად არსებობს დანაშაულის განმეორებით ჩადენის შესაძლებლობა. „შესაბამისად, ამ კრიტერიუმებზე დაყრდნობით, ყველა ჯერზე საბჭომ უარყოფითი გადაწყვეტილება მიიღო “, - თქვა ალექსანდრე დარახველიძემ ტელეკომპანია „რუსთავი 2“-ის ეთერში.
ბარნოვის ქუჩაზე ახალგაზრდა ქალის მკვლელობაში ბრალდებული წარსულში ძალადობისთვის იყო დაკავებული. მას პრეზიდენტის შეწყალების საფუძველზე სასჯელი გაუნახევრდა და საპატიმრო 2017 წლის 25 მაისს დატოვა.
ბაქრაძე სამართალდამცველებმა შაბათს თელეთში დააკავეს.