ტელეკომპანია „რუსთავი 2-ის“ ეთერში, „შაბათის კურიერში“ გავიდა მიმოწერის „სქრინი“ პრემიერ გიორგი კვირიკაშვილსა და პარლამენტის თავჯდომარე ირაკლი კობახიძეს შორის. გავრცელებული მიმოწერა „ქართულ ოცნებაში“ არსებულ დაპირისპირების საილუსტრაციოდ გასაჯაროვდა.
სიუჟეტში საუბარია, რომ პრემიერის პერსონალური გზავნილი, რომლის ადრესატიც პარლამენტის თავმჯდომარე იყო, მმართველი პარტიის დეპუტატების საერთო ჩათში გაიგზავნა. გიორგი კვირიკაშვილი მესიჯში ფრაქცია „ქართული ოცნების“ თავმჯდომარეს, მამუკა მდინარაძესაც, ახსენებს.
პრემიერი მესიჯში კობახიძეს წერს, რომ მისი არც ერთი მოსაზრება არ იყო გაზიარებული, რაც მისთვის სამწუხაროა.
კურიერის ინფორმაციით, მიმოწერამდე საპარლამენტო უმრავლესობის ერთ-ერთ შეკრებაზე დაპირისპირება მოხდა, როდესაც ირაკლი კობახიძემ პრემიერის თანდასწრებით შეურაცხყოფა მიაყენა ერთ-ერთ დეპუტატს და გიორგი კვირიკაშვილმა მას ამ დეპუტატისადმი ბოდიშის მოხდა მოსთხოვა.
ჟურნალისტების შეკითხვებზე უმრავლესობის წევრები პასუხობენ, რომ მმართველ გუნდში არანაირი დაპირისპირება არ არსებობს. თუმცა, უმრავლესობის წევრი დავით ჭიჭინაძე „რუსთავი 2-თან“ ამბობს, რომ მიმოწერა ნამდვილია და მოითხოვს გასაჯაროვდეს, პრემიერ გიორგი კვირიკაშვილის მიერ დეპუტატებისთვის მანამდე გაგზავნილი კიდევ ერთი შეტყობინება, სადაც გიორგი კვირიკაშვილი ერთობის შენარჩუნების აუცილებლობაზე საუბრობს.
„პრემიერმა, უბრალოდ, იმ განცხადებების შესაბამისად, რაც გაკეთდა, მაგის საპასუხოდ მოიწერა ეგ რომ მისი განცხადების ინტერპრეტირება ხდებოდა სხვანაირად. მაგას უძღოდა წინ სხვა გზავნილი და ის რატომღაც არ გაამჟღავნა ვიღაცამ. ის იყო მოწოდება ერთობისა და თავის შეკავებისკენ. ყველა მხარის მიმართ და ამის ინტერპრეტირება მოხდა და შემდეგ იყო ის გზავნილი, რომ ნურავინ ნუ ცდილობდა იმ გზავნილების ინტერპრეტირებას სათავისოდ, - ამბობს დავით ჭიჭინაძე.
