შინაგან საქმეთა მინისტრი გიორგი გახარია ამბობს, რომ მართლმსაჯულების სისტემის ძირითადი მამოძრავებელი ძალა ჰუმანური მიდგომა კი არ უნდა იყოს, არამედ, პირველ რიგში, მოქალაქეების უსაფრთხოების დაცვა.
შინაგან საქმეთა მინისტრის კომენტარს სამინისტროს პრესსამსახური ავრცელებს. მინისტრი ახალგაზრდა ქალის მკვლელობის საქმეზეც საუბრობს.
„ჩვენ, როგორც შინაგან საქმეთა სამინისტრო, ვერასოდეს ვერ ვიქნებით მძიმე დანაშაულებზე შეწყალების ასე ფართო გამოყენების მომხრე. ეს არის ერთმნიშვნელოვანი ფაქტი, ჩვენ ეს პოზიცია გვაქვს და ყველგან გვექნება დაფიქსირებული. მაგრამ ჩვენი მიდგომა არ არის ის, რომ ერთი კონკრეტული ან რამდენიმე მძიმე და ტრაგიკული შემთხვევის ირგვლივ ავაწყოთ რაღაც სისტემური ცვლილებები.
ამ კონკრეტულ შემთხვევაში, უმკაცრესი ღონისძიებები უნდა გატარდეს, გამოძიება უნდა დასრულდეს, რაც შეიძლება მალე. მოგეხსენებათ, რომ მსჯავრი წარდგენილია სხვა მუხლით, რაც 16-დან 20 წლამდე ან უვადო პატიმრობას ითვალისწინებს. მსგავსი ტრაგიკული შემთხვევები უმკაცრესად უნდა იყოს დასჯილი,“ - ამბობს გიორგი გახარია.