მომავალი სასწავლო წლიდან I-VI კლასებისთვის განახლებული ეროვნული სასწავლო გეგმა ინერგება. დაწყებითი საფეხურის მოსწავლეებისთვის რამდენიმე ცვლილება იგეგმება.

ცვლილებების შესახებ „ლიბერალი“ განათლებისა და მეცნიერების სამინისტროს ეროვნული სასწავლო გეგმების სამმართველოს უფროსს, მარიამ ჩიქობავას ესაუბრა.

მოსწავლეთა შეფასების სისტემა

მომავალი სასწავლო წლიდან ცვლილება შეეხება დაწყებითი საფეხურის მოსწავლეთა შეფასების სისტემას. უფრო კონკრეტულად კი, მარიამ ჩიქობავას განმარტებით, I-VI კლასის მოსწავლეებისთვის საშინაო დავალებებში ნიშანი არ დაიწერება. საშინაო დავალება არ გაუქმდება, თუმცა შემცირდება მათი რაოდენობა და მეტი აქცენტი მცირე პროექტული დავალებების მომზადებაზე გაკეთდება.

გარდა ამისა, თუკი I-IV კლასებში მოქმედი ეროვნული სასაწავლო გეგმით არ იწერება ნიშანი (ქულით არ ფასდებიან მოსწავლეები), ცვლილების მიხედვით ამგვარი მიდგომა მეხუთე კლასის პირველი სემესტრის ჩათვლით შენარჩუნდება. 

მარიამ ჩიქობავა ცვლილებას იმით ხსნის, რომ მოსწავლეებს მეტი დრო ექნებათ საგნობრივ მასწავლებლებთან ურთიერთობას მიეჩვივნონ და მასწავლებლებმაც სწორად აუხსნან განმსაზრვრელი შეფასების (ნიშნების დაწერის) მნიშვნელობა.

მე-2 კლასელებისთვის გაკვეთილი 5 წუთით შემცირდება

დაგეგმილი ცვლილების მიხედვით, მეორე კლასელებისთვის გაკვეთილის ხანგრძლივობა 5 წუთით შემცირდება და 40 წუთიანი გახდება, მესამე კლასიდან კი გაკვეთილების ხანგრძლივობა 45 წუთი იქნება.

ფიზიკური აღზრდის გაკვეთილების რაოდენობა იზრდება

თუკი მოქმედი ეროვნული სასაწავლო გეგმის თანახმად, ფიზიკური აღზრდის გაკვეთილების რაოდენობა კვირაში 2 საათი იყო, ახალი სასწავლო გეგმით კვირაში 3 საათი იქნება. დაწესდება ასევე შეზღუდვა, რომ რომელიმე საგნის სასარგებლოდ ფიზიკური აღზრდის, ხელოვნებისა და მუსიკი გაკვეთილებს დრო არ მოაკლდებათ.

„სახელმწიფო აუდიტის დასკვნა გავითვალისწინეთ, 25%-ის ფარგლებში სკოლას შეუძლია რომელიმე საგანს მოაკლოს დრო და სხვა საგანს გადაუნაწილოს, ყოველთვის ისე ხდებოდა, რომ ეს დრო აკლდებოდა ფიზიკურ აღზრდას, ხელოვნებას ან მუსიკას, თითქოს ჩათვლილი იყო რომ ეს მეორეხარისხოვანი საგნებია, მაშინ როცა დაწყებით კალსებში განსაკუთრებით მნიშვნელოვანია ამ საგნების სათანადოდ სწავლება“,- ამბობს მარიამ ჩიქობავა.

მომავალი სასწავლო წლიდან საგანი „მე და საზოგადოება“ დაინერგება

საზოგადოებრივი მეცნიერებების საფუძვლების საგნები, -  „მე და საზოგადოება" მე-3 და მე-4 კლასებისთვისაა განკუთვნილი; „ჩვენი საქართველო" კი - მე-5 და მე-6 კლასებისთვის. როგორც სამინისტროში აცხადებენ, მომავალი სასწავლო წლისთვის მზად იქნება ახალი სახელმძღვანელო აღნიშნული საგნებისთვის. 

სამინისტრომ გასცა რეკომენდაცია, რომ საგანი დაწყებითების პედაგოგებმა ასწავლონ. მარიამ ჩიქობავას განმარტებით, ამისი მიზეზი ისაა, რომ დაწყებითების პედაგოგები კარგად იცნობენ კლასს, მოსწავლეების საჭიროებებს და უფრო გაუადვილდებათ მოსწავლეებისთვის ისეთ თემებზე საუბარი, რაც საგნის ფარგლებში არის გათვალისწნებული, მაგალითად თანატოლებთან ან უფროსებთან ურთიერთობა, ოჯახის თემა და.ა.შ. თუმცა მისი თქმით, გადაწყვეტილებას სკოლა მიიღებს, საჭიროებიდან გამომდინარე.

მომავალი სასწავლო წლიდან სკოლებში I-VI კლასებში ახალი სახელმძღვანელოებიც შევა. სახელმძღვანელოების საჯარო განხილვის პროცესი უკვე დასრულდა. მარიამ ჩიქობავას თქმით, უახლოეს მომავალში ცნობილი გახდება იმ სახელმძღვანელოების ნუსხა, რომელთაც გრიფი მიენიჭებათ.