„უნდა მოხდეს [შეწყალების] კომისიის წევრთა შემადგენლობის გაფართოება და იმ ადამიანების მოწვევაც კომისიაში, რომლებიც შეიძლება კიდევ უფრო მეტად წაადგნენ ამ სტანდარტის აწევას. შეხვედრები კვლავ გაგრძელდება", - ამის შესახებ შეწყალების კომისიის თავმჯდომარე ზვიად ქორიძემ ძალადობის საკითხებზე მომუშავე არასამთავრობო ორგანიზაციებან შეწყალების კომისიის წევრებისა და პრეზიდენტის მრჩევლების შეხვედრის შემდეგ განაცხადა.
პრეზიდენტის ადმინისტრაციაში აცხადებენ, რომ შეხვედრის მონაწილეები შეწყალების მექანიზმის გენდერული მიმართულებით სტანდარტის გაზრდასა და კომისიის შემადგენლობის გაფართოებაზე შეთანხმდნენ.
პრეზიდენტის საპარლამენტო მდივნის ანა ნაცვლიშვილის განცხადებით, გადაწყვეტილების მიღების სტანდარტი გაცილებით უფრო მაღალი უნდა გახდეს.
„გვჭირდება დახმარება პროფესიონალი ადამიანებისა და კომპეტენტური წრეების. გვჭირდება ის, რომ დღეს, შედარებით ზოგადი რჩევები გარდაიქმნას უფრო კონკრეტულ გამოსავლებში. ეს პროცესი დავიწყეთ იმისთვის, რომ შინაარსი და გადაწყვეტილების მიღების სტანდარტი გაცილებით უფრო მაღალი გახდეს. არასამთავრობოებმა გამოთქვეს მზადყოფნა, რომ ამ პროცესში მიიღონ მონაწილეობა. ამ შეხვედრის ინიციატივა მოდის პრეზიდენტისგან და პრეზიდენტი ღია იმისთვის, რომ მოვისმინოთ განსხვავებული, მათ შორის, კრიტიკული მოსაზრებები, რაც ყოველთვის კარგია და დაეხმარება პროცესის გაუმჯობესებას", - აღნიშნა ანა ნაცვლიშვილმა.
