როგორც „ლიბერალს“ შინაგან საქმეთა სამინისტროს პრესსამსახურში უთხრეს, ვიდეო, რომელზეც ბავშვის მიმართ ძალადობა და დამამცირებელი მოპყრობაა ასახული, მალე წაიშლება. 

ორი არხით იყო გავრცელებული, ერთი უკვე წაიშალა, მეორეც მალე წაიშლება.  - ამბობენ შსს-ში. 

შინაგან საქმეთა სამინისტრომ სოციალურ ქსელში გავრცელებულ ამ ვიდეოსთან დაკავშირებით გამოძიება უკვე დაიწყო.

გამოძიება საქართველოს სსკ-ს 140-ე და 157-ე პრიმა მუხლების მეორე ნაწილებით დაიწყო და  5-დან 8 წლამდე ვადით თავისუფლების აღკვეთას ითვალისწინებს. 

157-ე პრიმა მუხლის მეორე ნაწილი გულისხმობს პირადი ცხოვრების საიდუმლოს უკანონოდ გამოყენებას ან/და გავრცელებას ამა თუ იმ ხერხით გავრცელებული ნაწარმოების, ინტერნეტის, მათ შორის, სოციალური ქსელის, მასობრივი მაუწყებლობის ან სხვა საჯარო გამოსვლის მეშვეობით.

მუხლი 140-ე კი  - სექსუალური ხასიათის შეღწევას თექვსმეტი წლის ასაკს მიუღწევლის სხეულში, ისჯება 8-დან 10 წლამდე. 

გამოძიების ამ ეტაპზე დადგენილია, რომ ვიდეო YouTube-ზე 2017 წლის სექტემბერში აიტვირთა, თუმცა სოციალურ ქსელში მიმდინარე წლის 20 აპრილს გავრცელდა. სამართალდამცველებმა დაადგინეს ვიდეოში დაფიქსირებული არასრულწლოვანი. დადგენილია ის პირიც, ვინც სოციალურ ქსელში ვიდეო ატვირთა, რომელიც, ასევე, არასრულწლოვანია. გამოძიების პირველადი ინფორმაციით, ორივე არასრულწლოვანი ერთი სკოლის მეშვიდე-მერვე კლასების მოსწავლეა.