ბიზნესომბუდსმენის ირაკლი ლექვინაძის თქმით, აგარის მეშაქრეების შესახებ ბანკების ასოციაციას დაუკავშირდნენ და გამოითქვა მზაობა, რომ მათი სესხები 6 თვით გადავადდეს.
„ჩვენ კომპანიის მეშვეობით გვაქვს იმ ადამიანების სია, ვისაც სხვადასხვა ბანკში აქვს სესხები. ესენი არ არის დიდი კრედიტები, მაგრამ უმუშევრობის პირობებში მისი გადახდა რთულია. გვქონდა კომუნიკაცია ბანკების ასოციაციასთან და არის მზაობა, რომ მოხდეს ამ სესხების 6 თვიანი გადავადება. ამის შესახებ თითოეულ კრედიტორს ბანკები თავად დაურეკავენ და გადავადებაზე შეუთანხმდებიან“, - განაცხადა ლექვინაძემ აგარის მეშაქრეებთან შეხვედრისას.
მისი თქმით, დღეს მთავრობის ადმინისტრაციაში აგარის შაქრის ქარხნის მმართველთან შეხვედრისას ქარხნის ამუშავების შესაძლებლობა განიხილეს. მმართველმა ქარხნის მუშაობის განახლების სურვილი გამოთქვა, სახელმწიფომ კი გაიზიარა რიგი საკითხები. ამიტომ, დეტალების დაზუსტებისა და საბოლოო შეთანხმების შემთხვევაში აგარაში შაქრის ქარხანა 1,5-2 თვეში აღდგება.
კომპანია „აგარის შაქრის“ თანამშრომლები 6-თვიანი იძულებითი მოცდენის შემდეგ ქარხნის ამუშავებას და საკითხში მთავრობის ჩართულობას მოითხოვენ. ორთვიანი, 24-საათიანი, უშედეგო საპროტესტო აქციის შემდეგ, აგარელებმა საპროტესტო აქცია დღეს უკვე მთავრობის კანცელარიასთან გამართეს. აგარელთა ნაწილი დაბიდან თბილისამდე ფეხით ჩამოვიდა.
აგარის მეშაქრეებმა ბიზნესომბუდსმენთან შეხვედრის შემდეგ აქცია დროებით შეწყვიტეს და ქარხნის მფლობელსა და სახელმწიფოს შორის მოლაპარაკების დასრულებას ელოდებიან.