ერევანში, პოლიციამ აქციის მონაწილეების დაშლა დაიწყო - ამის შესახებ NEWS.AM წერს. 

საინფორმაციო სააგენტოსვე ინფორმაციით, დეპუტატ ნიკოლ ფაშინიანის შემდეგ, პოლიციამ კიდევ ერთი ოპოზიციონერი, სასუნ მიქაელიანი და აქციის სხვა მონაწილეებიც დააკავა. 

დაკავებამდე სასუნ მიქაელიანმა დემონტრანტებს მოუწოდა, რომ არ დაიშალონ:"ჩვენ უნდა გავერთიანდეთ და გავათავისუფლოთ ნიკოლ ფაშინიანი".

აქციის დაშლის შესახებ პოლიციის ოფიციალურმა წარმომადგენელმა, აშოტ აგარონიანმა საკუთარ "ფეისბუქის" გვერდზე დაახლოებით 2 საათის წინ განაცხადა და აქვე აღნიშნა, რომ აქციის მონაწილეები პერიოდულად "შეკრების თავისუფლების" შესახებ კანონს არღვევენ და პოლიციის ბრძანებებს არ ემორჩილებიან.

პოლიციამ საპროტესტო აქციების ლიდერი, დეპუტატი ნიკოლ ფაშინიანი აქციის დაშლის დაწყებამდე დააკავა. ფაშინიანი დღეს სომხეთის ახალარჩეულ პრემიერს, სერჟ სარქისიანს ხვდებოდა, მაგრამ შეხვედრა რამდენიმე წუთი გაგრძელდა, სერჟ სარქისიანმა ოპოზიციის ლიდერთან საუბრის გაგრძელება აღარ ისურვა და შეხვედრა მალევე დატოვა. 

მეათე დღეა, ერევანში საპროტესტო გამოსვლებია. აქციის მონაწილეები მოითხოვენ გადადგეს პრემიერ-მინისტრი სერჟ სარქისიანი, რომელიც პრემიერის პოსტზე დაინიშნა პრეზიდენტის რანგში ათწლიანი მუშაობის შემდეგ. 

ფოტო:hetq.am - 13 აპრილი