პეკინის მე-8 საერთაშორისო კინოფესტივალი ქართულმა ფილმებმა გამარჯვებით დაასრულეს. მარიამ ხაჭვანის „დედემ“ და ანა ურუშაძის „საშიშმა დედამ“ 10 მთავარი ჯილდოდან 4 მოიპოვეს. ინფორმაციას „დედეს“ Facebook გვერდი ავრცელებს.
კინოფესტივალის მთავარ კონკურსში საუკეთესო რეჟისურისთვის ოქროს ტიანტანი მარიამ ხაჭვანს გადაეცა.
„დედეს“ გადაეცა ოქროს ტიანტანი საუკეთესო ოპერატორული ნამუშევრისთვისაც, პრიზი მინდია ესაძემ აიღო.
პეკინის კინოფესტივალზე საუკეთესო მსახიობი ქალის ნომინაციაში ოქროს ტიანტანი ნატო მურვანიძეს მიანიჭეს ფილმისთვის „საშიში დედა“.
საუკეთესო სრულმეტრაჟიანი ფილმისთვის კი კინოფესტივალის ჟიურის პრეზიდენტმა ვონგ კარ ვაიმ ოქროს ტიანტანი ანა ურუშაძეს გადასცა.