თავდაცვის ყოფილი მინისტრი ბაჩო ახალია, რომელსაც დღეს სერგო თეთრაძის წამების საქმეზე 9 წლით თავისუფლების აღკვეთა მიესაჯა, „ფეისბუქზე“ განცხადებას ავრცელებს.
ახალაიას თქმით, სასამართლო და მთლიანად ხელისუფლება მისთვის შეურაცხყოფის მიყენებითა და მორალური განადგურებით არის დაკავებული.
„მაგრამ ამ შეურაცხყოფაზე ჩემი ერთადერთი პასუხი იქნება ის, რომ რამდენი წელიც არ უნდა დაჭირდეს ყველაფერს გავაკეთებ იმისთვის, რომ ჩემს შვილებს, ჩემს ოჯახს, მთელ ქართულ საზოგადოებას სწორედ ამ მოსამართლეების პირიდან მოვასმენინო სრული სიმართლე. ისინი უნდა წარსდგნენ ხალხის წინაშე და დეტალურად მოყვნენ ვინ დაავალა ასეთი სიბინძურეების კეთება და რატომ ასრულებენ ასეთ ბინძურ დავალებებს“,- წერს ახალაია.
დღეს თბილისის საქალაქო სასამართლომ პოლკოვნიკ სერგო თეთრაძის წამების საქმეზე დამნაშავედ ცნო ბაჩო ახალაია და მასთან ერთად ბრალდებული ერთი პირი. პროკურატურის მტკიცებით, პოლკოვნიკისგან საქართველოს წინააღმდეგ ჯაშუშობის აღიარების მოთხოვნით, 2011 წლის სექტემბერში #8 პენიტენციური დაწესებულების მსჯავრდებულებმა თეთრაძე აწამეს, რის შედეგადაც ის გონზე მოუსვლელად გარდაიცვალა. ბრალდების მხარის ინფორმაციით, პოლკოვნიკის წამებაში მონაწილე მსჯავრდებულები ბაჩო ახალაიას მიერ შედგენილი გეგმის მიხედვით მოქმედებდნენ.
