„დღეს დიდებული დღეა. სომეხმა ხალხმა სამოქალაქო დაუმორჩილებლობით შეძლო და სერჟ სარგსიანი გადადგა. რა თქმა უნდა, ამის შემდეგ მეტია გასაკეთებელი ქვეყანაში რეფორმების ინსტიტუციონალიზაციისთვის. მე მსურს ვუთხრა სომეხ ხალხს, რომ ეს გამარჯვება არის ნამდვილი და არა სიმბოლური. მე ძალიან ვამაყობ ახალგაზრდებით, რომლებმაც შეძლეს ის, რაც მოხდა დღეს სომხეთში. მე თქვენ მიყვარხართ" - ასე ეხმაურება სომხეთში მიმდინარე ამბებს როკ ჯგუფის System of A Down-ის ვოკალისტი სერჟ ტანკიანი.
სომხეთის პრემიერ-მინისტრმა, სერჟ სარგსიანმა დღეს თანამდებობა დატოვა.
სომხეთში სერჟ სარგსიანის გადადგომის მოთხოვნით ათ დღეზე მეტია, აქციები მიმდინარეობს. ოპოზიცია აქციებს 13 აპრილიდან მართავს.
სერჟ სარგსიანი პრემიერ-მინისტრად 17 აპრილს აირჩია სომხეთის პარლამენტმა და მასშტაბური პროტესტის გამო, თანამდებობა არჩევიდან 6 დღეში დატოვა.
გუშინ ერევანში ოპოზიციური პარტიის ლიდერი ნიკოლ პაშინიანი დააკავეს, თუმცა დღეს სერჟ სარგსიანის გადადგომამდე რამდენიმე საათით ადრე სომხეთის ხელისუფლებამ ყველა დაკავებული გაათავისუფლა, მათ შორის ნიკოლ პაშინიანიც.
