სომხეთის ოპოზიციის ლიდერმა, ნიკოლ ფაშინიანმა მოსახლეობას ქუჩაში გასვლისა და ხავერდოვანი რევოლუციის ბოლომდე მიყვანისკენ მოუწოდა. მისი თქმით, „რესპუბლიკური პარტიის“ ხელში ძალაუფლების შენარჩუნების პირობებში ახალი რიგგარეშე არჩევნების შედეგი პროგნოზირებადია და სისტემა არ შეიცვლება.
ოპოზიციონერმა ლიდერმა ასეთი არჩევნების შემთხვევაში სამოქალაქო დაუმორჩილებლობისა და საარჩევნო უბნების ბლოკირების აუცილებლობაზე ისაუბრა.
„სომხეთის „რესპუბლიკური პარტიას“ და პრემიერ-მინისტრობის მოვალეობის შემსრულებელ კარენ კარაპეტიანს ჰგონიათ, რომ მოქალაქეები მხოლოდ სარგსიანის გადადგომით დაკმაყოფილდებიან. ასეთ ვითარებაში ძალიან მკაფიოდ უნდა გამოვხატოთ ჩვენი პოზიცია. ჩვენ ვერ დავუშვებთ, ახალი პრემიერ-მინისტრი ისევ „რესპუბლიკური პარტიიდან“ აირჩიონ და კორუფციულმა სისტემამ არსებობა განაგრძოს.
სერჟ სარგსიანი წავიდა, თუმცა სხვა „რესპუბლიკელებსაც“ უნდა ჩამოვართვათ ძალაუფლება. ჩვენ ვერ დავუშვებთ, რომ სარგსიანმა განაგრძოს ქვეყნის მართვა კულისებიდან“, - განაცხადა ფაშინიანმა.
ფაშინიანის მოწოდების შემდეგ ერევანში საპროტესტო აქციები განახლდა.11:00 საათიდან მოქალაქეები ცენტრალური მოედნისკენ მსვლელობით დაიძრნენ.