პროფკავშირების გაერთიანების ინფორმაციით, რამდენიმე წუთის წინ აგარის ქარხნის ხელმძღვანელების, პროფკავშირების წარმომადგენლებისა და ბიზნესომბუდსმენის შეხვედრა დასრულდა.
შეთანხმების თანახმად, 1 მაისიდან ქარხანაში სარემონტო სამუშაოები დაიწყება და ვინც აღნიშნულ საქმეზე დაკავდება, ხელფასს სრული ოდენობით მიიღებს, სხვები კი ქარხნის სრულ დატვირთვამდე, რასაც შესაძლოა ერთი თვე დასჭირდეს, ავანსის სახით ნახევარი თვის კომპენსაციას.
პროფკავშირების ცნობით, გეგმა მოქმედებს 31 დეკემბრამდე. წლის ბოლომდე ქარხნის მეპატრონემ უნდა დადოს საწარმოს დატვირთვისა და შეუჩერებლად მუშაობის გრძელვადიანი პროექტი.
კომპანია „აგარის შაქრის“ თანამშრომლები 6-თვიანი იძულებითი მოცდენის შემდეგ ქარხნის ამუშავებას და საკითხში მთავრობის ჩართულობას მოითხოვენ. ორთვიანი, 24-საათიანი, უშედეგო საპროტესტო აქციის შემდეგ, აგარელებმა საპროტესტო აქცია 20 აპრილს უკვე მთავრობის კანცელარიასთან გამართეს. აგარელთა ნაწილი დაბიდან თბილისამდე ფეხით ჩამოვიდა.