Facebook აპირებს, რომ სოციალურ ქსელს გაცნობის აპლიკაცია დაემატოს. მარკ ზაკერბერგის თქმით, ახალი აპლიკაცია გაცნობის ისეთ ცნობილ ქსელებს გაუწევს კონკურენციას, როგორიცაა Tinder და სხვ.

სან ხოსეში სიტყვით გამოსვლისას მარკმა აპლიკაციის მახასიათებლებზე ისაუბრა და თქვა, რომ ის ხელს შეუწყობს „ნამდვილ გრძელვადიან ურთიერთობებს და არა ერთი ღამის შეხვედრებს“. „ჩვენ გვსურს Facebook იყოს იქ, სადაც ღრმა ურთიერთობები იწყება“, - განმარტა Facebook-ის დამფუძნებელმა.

აპლიკაციაზე მომუშავე ჯგუფის უფროსმა ოფიცერმა, კრის კოქსმა კი განმარტა, რომ მართალია, აპლიკაცია Facebook-ზე იქნება მიბმული, ის დაიცავს მომხმარებელთა პირად ინფორმაციას. მასში აქტიურ მომხმარებელთა მხოლოდ სახელები გამოჩნდება, თანაც Facebook-ის მეგობრები ერთმანეთს აქ ვერ შეხვდებიან.

აპლიკაციის შესახებ ინფორმაცია არც მომხმარებელთა Facebook კედელზე მოხვდება. ახალ აპლიკაციაზე დარეგისტრირებულ მომხმარებლებს Facebook-ზე გაკეთებულ ღონისძიებებზე დამსწრე იმ ხალხის ნახვაც შეეძლებათ, ვინც აპლიკაციასაც იყენებს. ეს ადამიანებს საშუალებას მისცემს, მათთთან უფრო დაახლოებული ინტერესების მქონე ხალხი გაიცნონ და ურთიერთობის დასაწყებად მეტი საფუძველი ჰქონდეთ.

როგორც კონფერენციაზე ითქვა, ახალი აპლიკაცია ასევე არ გამოიყენებს Facebook-ის მიმოწერის სერვისებს WhatsApp-სა და Facebook Messenger-ს და საკუთარ სისტემას შექმნის.