პრეზიდენტის პარლამენტში სიტყვით გამოსვლის შემდეგ დებატებისას პარლამენტსა და პრეზიდენტს მიმართა „პატრიოტთა ალიანსის“ წევრმა ადა მარშანიამ.
„პატრიოტთა ალიანსის“ წევრმა სიტყვით გამოსვლისას ყურადღება გაამახვილა საქართველო-რუსეთის ურთიერთობებზე. ადა მარშანიამ მოუწოდა პრეზიდენტს, მთავრობას და პარლამენტს, მიჰყვნენ „პატრიოტთა ალიანსის“ მიერ შეთავაზებულ NATO-რუსეთი-საქართველოს სამმხრივ დიალოგს და გაითვალისწინონ რუსეთის ინტერესები.
მარშანიამ ასევე მიმართა ბოკერიას, რომ ახალგაზრდებში ანტირუსული და ანტიპუტინისტური განწყობების გაღვივება შეწყვიტოს.
„მე ვიცი პირველ რიგში, ბატონო ბოკერია, რომ პუტინი არის რუსეთის ფედერაციის პრეზიდენტი და ეს მინდა, შეგახსენოთ. ეს უნდა გახსოვდეთ თქვენ ყოველ წუთს. ისიც მინდა შეგახსენოთ, რომ მოსწონთ მათ თუ არა, მთელი მსოფლიო იმ ადამიანს ელაპარაკება, რომელიც თქვენ ასე არ მოგწონთ.
მაგრამ კიდევ ერთხელ შეგახსენებთ, რომ ეს პუტინი ადამიანი ვლადიმირი არის უძლიერესი, ძალიან რთული და მძიმე, ანგარიშგასაწევი, მე ასე ვიტყოდი“, - მიმართა ადა მარშანიამ „ევროპული საქართველოს“ წევრს [სტილი დაცულია].
„პატრიოტთა ალიანსის“ წევრმა დაამატა, რომ ჟენევის მოლაპარაკებები არაფრის მომტანია და საქართველოს გაერთიანებისთვის საჭიროა აფხაზებსა და ოსებთან პირდაპირი დიალოგი.
