„ლომბარდები, გარკვეულწილად, გადაიქცა ჭარბვალიანობის ერთ-ერთ მიზეზად და უფრო მეტიც, არის შემთხვევები, როდესაც ის გახდა კრიმინალის წამახალისებელი წყარო“,- ამის შესახებ ფინანსთა მინისტრმა, მამუკა ბახტაძემ „ფეისბუქზე“ პირდაპირი ჩართვისას განაცხადა.
მისი ინფორმაციით, უწყების მოსაზრებაა, რომ ლომბარდებში აიკრძალოს როგორც ავტომანქანების, ასევე უძრავი ქონების ე.წ. დალომბარდება.
ამასთან, მინისტრის განმარტებით, ლომბარდებზეც გავრცელდება ის რეგულაციები, რომლებიც სესხის გამცემ დაწესებულებებს ეხება. მათ შორისაა, საპროცენტო ჭერისა და მაქსიმალური ზღვარის განსაზღვრა. ბახტაძის შეფასებით, რეგულაციების არარსებობამ წაახალისა მოქალაქეებსა და ლომბარდებს შორის არაჯანსაღი ურთიერთობა.
„ლომბარდებთან დაკავშირებით ახალი რეგულაცია აუცილებლად შემოვა და ჩემი განწყობაა, რომ ეს მაისშივე უნდა მოხდეს. ძალიან დაბალი დონის არგუმენტაცია მოვისმინეთ ჩვენი ოპონენტებისგან, რომ, თურმე, თუ ლომბარდებს არ ექნებათ ავტომანქანების დალომბარდების უფლება, ვისაც ბიზნესის დაწყების სურვილი აქვს, მას სასტარტო კაპიტალზე წვდომა შეეზღუდება. რომელი წარმატებული ბიზნესი იცით, რომლის სასტარტო კაპიტალი იყო ლომბარდში ჩადებული ავტომობილი?“