მთავრობა თბილისის მერიას ინფრასტრუქტურული პროექტებისთვის 30 მილიონ ლარს გამოუყოფს. თბილისის მერის, კახა კალაძის თქმით, ეს ფინანსური რესურსი ქალაქში სპორტული ინფრასტრუქტურის განვითარებაში დაეხმარებათ.
„დამატებით გამოყოფილი 30 მილიონი ლარი თბილისის მერიას საშუალებას მისცემს, მიმდინარე წელსვე განახორციელოს 2019-2020 წლებისთვის დაგეგმილი ინფრასტრუქტურული პროექტები. ეს კი დედაქალაქის მუნიციპალიტეტს მომდევნო ორი წლის ბიუჯეტში გამოუთავისუფლებს ფინანსურ რესურსს, რომელიც სპორტული ინფრასტრუქტურის განვითარებაზე დაიხარჯება“, - ნათქვამია პრემიერ-მინისტრის განცხადებაში.
პრემიერის განცხადებით, ეს გადაწყვეტილება მისი ინიციატივის ნაწილია, რომელიც ქვეყანაში ჯანსაღი ცხოვრების წესის ხელშეწყობას გულისხმობს. ჯანსაღი ცხოვრების წესის დამკვიდრებისთვის, პრემიერის განცხადებით, ერთ თვეში უნდა დასრულდეს ქვეყნის მასშტაბით სპორტული ინფრასტრუქტურის აღწერა და არსებული საჭიროებების შესწავლა, რის შემდეგაც სამოქმედო გეგმა მომზადდება.
მთავრობის გეგმის მიხედვით, მომავალი სამი წლის განმავლობაში, სპორტულ აქტივობაში ჩართული მოსახლეობის რაოდენობა უნდა გაორმაგდეს და ევროპულ მაჩვენებელს დაუახლოვდეს.
