„პატრიოტთა ალიანსის" დეპუტატები დღეს მოსკოვში გაემგზავრნენ. „პატრიოტთა ალიანსის" დეპუტატის, ადა მარშანიას განცხადებით, შეხვედრებზე საუბარი შეეხება რუსეთ-საქართველოს შორის არსებულ ყველა საჭირბოროტო საკითხს.
„სახელმწიფო დუმასა და ფედერაციის საბჭოში გვექნება შეხვედრები, მაგრამ სახელმწიფო დუმაში ამჯერად სხვადასხვა კომიტეტის დეპუტატებს შევხვდებით, გარდა ბატონი კალაშნიკოვის კომიტეტისა. ეს იქნება მესამე ვიზიტი და იმაზე ვისაუბრებთ, რაზეც ვსაუბრობდით პირველ და მეორე შეხვედრებზე. ყოველთვის იქნება საუბარი სოხუმზე, ცხინვალზე, მცოცავ ოკუპაციაზე, ყველა იმ ძალიან მძიმე და ტრაგიკულ თემაზე, რაც რუსეთის ფედერაციასა და ჩვენს ქვეყანას შორის არსებობს. ჩვენ გვინდა, რომ არც ერთი თემა ტაბუირებული არ იყოს. ყველა საჭირბოროტო საკითხზე სასაუბროდ მზად ვართ. ვნახავთ მათ რეაქციას", - განაცხადა ადა მარშანიამ.
ადა მარშანიასთან ერთად მოსკოვში გაემგზავრნენ „პატრიოტთა ალიანსის" დეპუტატები ნატო ჩხეიძე და გიორგი ლომია და პარტიის ერთ-ერთი ლიდერი დავით თარხან-მოურავი. ადა მარშანიას თქმით, შეხვედრებში მონაწილეობას მხოლოდ დეპუტატები მიიღებენ.
