ერთობლივი წვრთნის გამო, რომელიც სამხრეთ კორეამ აშშ-თან ერთად გამართა, ჩრდილო კორეამ სამშვიდობო მოლაპარაკება შეწყვიტა.
ჩრდილო კორეის ცენტრალური ახალი ამბების სააგენტოს ინფორმაციით, ქვეყნის ხელისუფლებამ ამ წვრთნებს პროვოკაციად და სამხედრო აგრესიის რეპეტიციად მიიჩნევს.
ჩრდილო კორეის მთავრობამ ასევე გააფრთხილა აშშ, რომ შესაძლოა ჩაიშალოს ისტორიული შეხვედრაც კიმ ჩენ ინსა და დონალდ ტრამპს შორის, რომელიც 12 ივნისს არის დაგეგმილი.
აშშ-ის სახელმწიფო დეპარტამენტის განცხადებით, თეთრი სახლი შეხვედრისთვის მზადებას ჩვეულებრივ განაგრძობს და ჩრდილო კორეის მხრიდან პოზიციის შეცვლაზე შეტყობინება არ მიუღიათ.
რაც შეეხება სამხრეთ კორეასთან შეწყვეტილ მოლაპარაკებას, ჩრდილო კორეამ შეაჩერა იმ საკითხებზე მსჯელობა, რომლებზეც ორი ქვეყნის ლიდერი 27 აპრილს გამართულ შეხვედრაზე შეთანხმდნენ. ეს გულისხმობს სასაზღვრო-დემილიტარიზებული ზონის „სამშვიდობო ზონად“ გარდაქმნას; ორივე კორეის მიერ სამხედრო რესურსის შემცირებას და ოთხმხრივი მოლაპარაკების დაწყებას, რომელშიც აშშ და ჩინეთიც ჩაერთვებიან.