ასოციაცია „თემიდა", რომლის მისიაც ლბტ ქალთა გაძლიერება და ლგბტქი ადამიანთა მხარდაჭერაა, დღეს თბილისში ჰომოფობიასთან, ბიფობიასა და ტრანსფობიასთან ბრძოლის საერთაშორისო დღესთან დაკავშირებული აქციის გაუქმებაზე განცხადებას ავრცელებს.
„გამომდინარე იქედან, რომ ასოციაცია „თემიდა“ იყო ერთ-ერთი თანაორგანიზატორი 17 მაისის აქციისა, ვიღებთ პასუხისმგებლობას საკუთარ თავზე და ვუერთდებით სხვა სათემო, ადამიანის უფლებებზე მომუშავე და დამოუკიდებელ აქტივისტთა განცხადებას და მივიჩნევთ, რომ მიღებული გადაწყვეტილება აქციის გაუქმებასთან დაკავშირებით შექმნილ ვითარებაში არის საუკეთესო გამოსავალი." - ნათქვამია განცხადებაში.
ამავე განცხადების მიხედვით, ბოლო პერიოდში სხვადასხვა ნეონაცისტური ჯგუფის გაძლიერება შეიმჩნევა.
„შესაბამისად, მოვუწოდებთ ხელისუფლებას, რომ გააცნობიეროს საკუთარი პასუხისმგებლობა და განახორციელოს პრევენციული სახის ღონისძიებები, რათა თავიდან აიცილოს სამოქალაქო დაპირისპირებების რისკები, რაც შესაძლოა მოდიოდეს ნეო-ნაცისტური დაჯგუფებების მხრიდან." - ნათქვამია განცხადებაში.
ორგანიზაციის ინფორმაციით, ჰომოფობიური სიძულვილით მოტივირებულ დანაშაულთა რიცხვი იზრდება 17 მაისის მოახლოებისას და გრძელდება მაისის ბოლომდე.
„შემთხვევათა დიდი ნაწილი ხდება ქუჩებში საღამოს საათებში. ამიტომ, ვთხოვთ ლგბტქი ადამიანებს გამოიჩინონ განსაკუთრებული სიფრთხილე ქუჩაში გადაადგილებისას. ნებისმიერი ეჭვის შემთხვევაში დაუყოვნებლივ მიმართეთ პოლიციას ნომერზე 112, სახალხო დამცველს ნომერზე - 1481 და სათემო და ადამიანის უფლებებზე მომუშავე ორგანიზაციებს."