ასოციაცია „თემიდა", რომლის მისიაც ლბტ ქალთა გაძლიერება და ლგბტქი ადამიანთა მხარდაჭერაა, დღეს თბილისში ჰომოფობიასთან, ბიფობიასა და ტრანსფობიასთან ბრძოლის საერთაშორისო დღესთან დაკავშირებული აქციის გაუქმებაზე განცხადებას ავრცელებს. ორგანიზაციის განცხადებით, აქციის გაუქმება შექმნილ ვითარებაში საუკეთესო გამოსავალია.
ამავე განცხადებაში ორგანიზაცია ლგბტქი ადამიანებს მიმართავს, გამოიჩინონ სიფრთხილე ქუჩაში გადაადგილებისას და ასევე მოუწოდებს შსს-ს და ხელისუფლებას, გამოიჩინონ განსაკუთრებული ყურადღება მაისის პერიოდში და მოახდინონ დაუყოვნებლივი რეაგირება სიძულვილით მოტივირებულ დანაშაულებებზე.
„აღნიშნული მოწოდება საფუძვლიანია, რადგან ბოლო პერიოდში არსებული აგრესია, რაც მოდის ნეონაცისტური ჯგუფებისგან ზრდის ჰომობობიურ განწყობებს საზოგადოებაში."
ორგანიზაციის ინფორმაციით, ჰომოფობიური სიძულვილით მოტივირებულ დანაშაულთა რაოდენობა იზრდება 17 მაისის მოახლოებისას და გრძელდება მაისის ბოლომდე.
„შემთხვევათა დიდი ნაწილი ხდება ქუჩებში საღამოს საათებში. ამიტომ, ვთხოვთ ლგბტქი ადამიანებს, გამოიჩინონ განსაკუთრებული სიფრთხილე ქუჩაში გადაადგილებისას. ნებისმიერი ეჭვის შემთხვევაში დაუყოვნებლივ მიმართეთ პოლიციას ნომერზე 112, სახალხო დამცველს ნომერზე - 1481 და სათემო და ადამიანის უფლებებზე მომუშავე ორგანიზაციებს."