გორში, წმინდაწყლის დასახლებაში, იეჰოვას მოწმეების სამეფო დარბაზს, სავარაუდოდ, ესროლეს და კედელზე დაუტოვეს წარწერა: „იწამეთ ღმერთი ჩვენი“. ინფორმაციას ადამიანის უფლებათა ცენტრი ავრცელებს.
ადგილობრივების განცხადებით, იეჰოვას მოწმეების სამეფო დარბაზს, სავარაუდოდ, სანადირო თოფიდან ესროლეს.
ფოტო: qartli.ge
„ლიბერალს“ შსს-ში უთხრეს, რომ გამოძიება დაწყებულია სისხლის სამართლის ორი მუხლით - 187-ე და 156-ე მუხლების პირველი ნაწილით. ეს სხვისი ნივთის დაზიანებას გულისხმობს, რამაც მნიშვნელოვანი ზიანი გამოიწვია და ადამიანის დევნას აღმსარებლობის, რწმენის ან მრწამსის გამო.
შსს-ს ინფორმაციით, ექსპერტიზა დაადგენს შენობა იარაღით დააზიანეს თუ არა.
როგორც შიდა ქართლის საინფორმაციო ცენტრი წერს, გორში იეჰოვას მოწმეების რელიგიურ საქმიანობაში ხელის შეშლის ეს შემთხვევა პირველი არ არის. ორი თვის წინ სამეფო დარბაზის გალავანზე ჯვრები გამოსახეს.