გაზეთმა „ასავალ-დასავალმა“ უზენაესი სასამართლოს გადაწყვეტილება აღასრულა და  საჯაროდ უარყო 2014 წელს გამოცემის სხვადასხვა ნომერში გავრცელებული ცრუ ინფორმაცია თიბისი ბანკისა და მამუკა ხაზარაძის შესახებ. გაზეთმა გადაიხადა დაკისრებული ფულადი კომპენსაციაც. ინფორმაციას თიბისი ბანკი ავრცელებს.

თიბისი ბანკმა და მამუკა ხაზარაძემ „ასავალ-დასავალის“ წინააღმდეგ სარჩელი 2014 წლის თებერვალში შეიტანეს. მიზეზი პიროვნებისა და ბანკის დისკრედიტაციისადმი მიზანმიმართული გრძელვადიანი კამპანია იყო.

სასამართლო დავამ სასამართლოს ყველა ინსტანცია გაიარა. საბოლოოდ, 2017 წლის სექტემბერში უზენაესმა სასამართლომ დავა თიბისი ბანკის სასარგებლოდ დაასრულა. „ასავალ-დასავალს“ გავრცელებული ცრუ ინფორმაციის უარყოფა იმავე გვერდზე და იმავე შრიფტით, ასევე 5 000 ლარიანი კომპენსაციის გადახდა დაევალა.

„ყველა ეტაპზე სასამართლოს გადაწყვეტილებით, საქმე ეხებოდა როგორც ცრუ ინფორმაციის გავრცელებას თიბისი ბანკისა და მისი დამფუძნებლის შესახებ, ისე მამუკა ხაზარაძის პატივის, ღირსებისა და საქმიანი რეპუტაციის შელახვას.

სიცრუის უარყოფის გარდა, სასამართლოს გადაწყვეტილების შესაბამისად, გაზეთმა ასევე გადაიხადა მორალური ზიანის ასანაზღაურებლად დაკისრებული ფულადი კომპენსაცია. მამუკა ხაზარაძის გადაწყვეტილებით, თანხა  თბილისის სახელმწიფო უნივერსიტეტის სოციალური და პოლიტიკური მეცნიერებების ფაკულტეტის ჟურნალისტიკის მიმართულების წარჩინებულ სტუდენტებს  სტიპენდიის სახით გადაეცემათ“, - წერს თიბისი ბანკი.